Pep Guardiola
Spænski stjórinn Pep Guardiola segir það ekki vera ákjósanlegt að mæta Everton á þessum tímapunkti tímabilsins en liðið heimsækir Manchester City á Etihad á morgun.
Síðustu vikur hafa verið þær verstu í stjóratíð Guardiola og virðist hann ekki vera nær því að finna lausn á vandamálinu.
Aldrei er hægt að afskrifa endurkomu Man City þegar það kemur að titilbaráttu en það gæti nú þegar verið of seint í þessu tilfelli þar sem Liverpool er með 12 stiga forystu og á leik inni.
Guardiola hugsar ekki of langt fram í tímann og er einbeittur á næsta verkefni sem er gegn Everton á morgun, en það verður engin gönguferð í garðinum.
„Everton er ekki ákjósanlegur andstæðingur. Þetta snýst um að koma okkur aftur í okkar besta form, en það mun taka tíma. Við þurfum að ná í úrslit eins fljótt og mögulegt er.“
„Við erum að mæta Everton og þeir eru á góðu skriði, úrslitin og frammistaðan sýnir það,“ sagði Guardiola.
Everton hefur tekist að ná í stig af bæði Arsenal og Chelsea á síðustu vikum og er sem stendur með 15 stig í 16. sæti.
Athugasemdir
