Spá Fótbolta.net - 10. sæti: ÍA

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. ÍA 33 stig
11. Keflavík 19 stig
12. Fram 17 stig

Um liðið: ÍA hélt sér uppi eftir ótrúlegan endasprett á síðasta tímabili eftir mikið ströggl framan af móti. ÍA var í bontsætinu eftir nítján umferðir og fimm stigum frá öruggu sæti. Heimavöllurinn skilaði liðinu fimmtán stigum af 21 á síðasta tímabili. ÍA endaði í níunda sæti, fékk á sig tvö mörk að meðaltali en var einungis stigi frá því að enda í sjöunda sæti. Skagamenn hafa misst aðeins úr hópnum frá því í fyrra en fengið menn inn í sömu stöður í staðinn.



Þjálfari - Jón Þór Hauksson: Jón Þór er mættur aftur að þjálfa ÍA eftir fjögur tímabil annars staðar. Hann var ráðinn í janúar þegar KSÍ réði Jóhannes Karl Guðjónsson sem aðstoðarlandsliðsþjálfara. Jón Þór tók við Vestra síðasta sumar og gerði flotta hluti þar. Þar á undan var hann þjálfari kvennalandsliðsins. Með ráðningunni á Jóni Þór hélt stjórn ÍA í það að heimamaður væri þjálfari meistaraflokks karla.

Styrkleikar: Ungu mennirnir í liðinu orðnir árinu eldri. Brynjar Snær, Steinar, Gísli Laxdal, Jón Gísli og Guðmundur Tyrfings. Þeir hafa spilað talsvert saman og ættu að þekkja vel inn á hvern annan. Kantmennirnir ættu að vera styrkleiki liðsins, mjög öflugir leikmenn sem mikið mun mæða á.

Veikleikar: Ísak Snær sem var farinn að blómstra undir lok tímabils er farinn og í staðinn fær liðið Christian Köhler sem Valur vildi ekki halda. Leiðtogahæfni Sindra Snæs er horfin á brott og sömu sögu má segja með Óttar Bjarna í vörninni. Liðið var með næst verstu vörnina í fyrra og notaði þrjá markmenn. Wout Droste sem kom til liðsins í fyrra glímir við nokkuð þrálát meiðsli og er spurning hversu mikið hann getur verið með.

Lykilmenn: Kaj Leo í Bartalsstovu og Aron Bjarki Jósepsson. Tveir nýir leikmenn sem verða í lykilhlutverki. Óttar Bjarni er farinn og Aron Bjarki þarf að koma inn sem leiðtogi. Kaj hefur sýnt það á köflum að hann er frábær leikmaður í efstu deild á Íslandi en vöntun á fleiri toppframmistöðum er líkleg ástæða fyrir því að hann er ekki í einu af toppliðunum. Kaj er með eitraðan vinstri fót og Aron Bjarki kemur með mikla þekkingu eftir mörg ár í Vesturbænum.

Hlaðvarpsþátturinn Ungstirnin mælir með:
Sama og í fyrra! Gísli Laxdal Unnarsson er virkilega leikinn og kraftmikill leikmaður sem hefur verður í lykilhlutverki í liði Skagamanna í sumar. Gísli sýndi síðasta sumar hversu góður hann getur verið þar sem hann skilaði sjö mörkum í 27 leikjum samtals. Hann hefur verið frábær á undirbúningstímabilinu undir Jóni Þór og við viljum sjá meira frá Laxinum í sumar. Gísli er orðinn reyndari leikmaður eftir viðburðarríkt tímabil í fyrra og viljum við sjá hann taka liðið lengra en fólk kannski býst við frá ÍA í sumar.

Spurningarnar: Miðsvæðið. Liðið missir Sindra og Ísak og í staðinn koma Christian Köhler og Benedikt Warén. Brynjar Snær Pálsson og Steinar Þorsteinsson þurfa að eiga stöðugra tímabil en í fyrra - það efast enginn um hæfileika þeirra á sínum besta degi en hversu margir slíkir dagar verða í sumar? Markaskorun Viktors Jónssonar. Hann skoraði þrjú mörk í fyrra en þarf að skora meira í sumar ef ÍA ætlar sér í baráttu um sæti í efri hlutanum. Hvor Árninn verður í markinu?

Völlurinn: Norðurálsvöllurinn. Heimavöllurinn skilaði fínum fjölda stiga í fyrra og það er alltaf nostalgíufílingur að skella sér á Akranes á völlinn. Þegar þegar sólin skín hentar brekkan ákaflega vel!

Fyrirliðinn segir - Árni Snær Ólafsson
„Það er bara flott og skemmtilegt. Við bara sýnum að við erum aðeins betri en það. Við stefnum allataf hærra en ég skil þessa spá. Við erum ekki búnir að skrifa neitt markmið niður en erum búnir að ræða þetta og teljum okkur betri en tíunda sætið. Ég er bjartur á þetta tímabil, við erum farnir að æfa á grasi og þá fær maður svona kitl og ég held að þetta nýja fyrirkomulag verði geggjað. Það eru komnir 4-5 leikmenn sem eru að gera tilkall á byrjunarliðssæti, þeir eru allir mjög góðir og eru alvöru viðbót við okkar hóp. Það er vonandi að þeir bæti liðið."

Komnir
Aron Bjarki Jósepsson frá KR
Benedikt Warén frá Breiðabliki (á láni)
Christian Köhler frá Val
Johannes Vall frá Val
Kaj Leo í Bartalsstovu frá Val
Oliver Stefánsson frá Svíþjóð (á láni)

Farnir
Aron Kristófer Lárusson til KR
Dino Hodzic í Kára
Elias Tamburini til Þýskalands
Hákon Ingi Jónsson í Fjölni
Ísak Snær Þorvaldsson í Breiðablik (var á láni frá Norwich)
Óttar Bjarni Guðmundsson í Leikni
Sindri Snær Magnússon til Keflavíkur

Fyrstu fimm leikir ÍA:
19. apríl Stjarnan - ÍA
24. apríl ÍA - Víkingur R.
2. maí Fram - ÍA
7. maí ÍA - Breiðablik
11. maí Valur - ÍA

Hin hliðin:
Árni Marinó Einarsson

Sterkasta byrjunarliðið að mati Fótbolta.net:


Aðrir leikmenn:
Árni Marinó Einarsson - 1
Oliver Stefánsson - 4
Wout Droste - 5
Hallur Flosason - 8
Breki Þór Hermansson - 14
Marteinn Theodórsson - 15
Eyþór Aron Wöhler - 19
Guðmundur Tyrfingsson - 20
Haukur Andri Haraldsson - 21
Benedikt V. Warén - 22
Ingi Þór Sigurðsson - 23
Hlynur Sævar Jónsson - 24
Jóhannes Breki Harðarsson - 25
Gabríel Þór Þórðarson - 26
Árni Salvar Heimisson - 27
Daníel Ingi Jóhannesson - 28
Finnbogi Laxdal Aðalgeirsson - 29
Logi Mar Hjaltested - 30

Spámennirnir: Aksentije Milisic, Brynjar Ingi Erluson, Egill Sigfússon, Elvar Geir Magnússon, Guðmundur Aðalsteinn Ásgeirsson, Hafliði Breiðfjörð, Sverrir Örn Einarsson, Sæbjörn Þór Þórbergsson Steinke, Tómas Þór Þórðarson og Úlfur Blandon