Pablo Longoria forseti Marseille viðurkennir að franska félagið hafi rætt við Paul Pogba í vetur en á endanum ákveðið að fara ekki lengra með viðræðurnar.
Pogba er búinn að taka út langt leikbann sem hann fékk fyrir að falla á lyfjaprófi og er án félags sem stendur.
„Við ákváðum að semja ekki við Pogba í vetur. Við áttum samræður við hann en komumst að þeirri niðurstöðu að það gæti haft neikvæð áhrif á leikmannahópinn," sagði Longoria um félagaskiptin.
Pogba fékk upprunalega fjögurra ára bann frá fótbolta sem var stytt niður í 18 mánuði.
Pogba, sem er nýlega búinn að eiga 32 ára afmæli, var á sínum tíma talinn efnilegasti miðjumaður Evrópu en dalaði eftir mikil meiðslavandræði á dvöl sinni hjá Manchester United.
Hann var lykilmaður í landsliði Frakklands og vann HM með þjóð sinni eftir að hafa endað í öðru sæti á EM.
Athugasemdir
