Heimir Guðjónsson þjálfari Vals.
Valur mætir ÍA í opnunarleik Pepsi Max-deildarinnar á morgun og Heimir á von á hörkuleik. Skagamenn unnu 1 - 4 á Origo-vellinum í fyrra.
„Menn hafa greinilega trú á Blikaliðinu, og það er jákvætt," sagði Heimir Guðjónsson þjálfari Vals við Fótbolta.net í dag.
Margir hafa spáð því að Valur verji Íslandsmeistaratitilinnn í ár en enn fleiri eru þó farnir að veðja á lið Breiðabliks í þeim efnum.
„Að mínu mati eru menn að setja smá pressu á Blikana og sjá hvort þeir standist hana. Spá er samt bara spá," sagði Heimir en lítur hann á Blikana sem helstu ógn Vals í sumar?
„Breiðablik, ásamt KR, FH og Stjörnunni og fleiri liðum því það er alltaf eitt lið sem kemur á óvart. Þetta verður hörkumót og menn virðast halda að það verði jafnt og skemmtilegt sem er bara jákvætt."
Valur mætir ÍA í fyrsta leik Pepsi Max-deildarinnar annað kvöld. Þegar liðin mættust á Origo-vellinum á síðasta ári komu Skagamenn, sáu og sigruðu 1 - 4. Flestir spá ÍA falli í sumar.
„Við verðum að undirbúa okkur vel, þetta er hörkuleikur og ef þú lítur á skagaliðið og hvernig er búið að spá þeim, þá verður ekki erfitt fyrir þá að mótivera sig fyrir leikinn á móti okkur. Þeir eru með gott lið að mínu mati og þetta verður hörkuleikur."
Valsmenn hafa verið að missa menn á meiðslalista rétt fyrir mót, Tryggvi Hrafn Haraldsson fótbrotnaði í æfingaleik gegn Víkingum auk þess sem Arnór Smárason er meiddur og Heimir býst við að hann verði frá í einhverjar vikur.
„Það er aldrei gott að vera með menn meidda og við viljum að allir séu heilir. Þetta er fylgifiskur fótboltans að menn meiðist og við teljum að við séum með stóran og sterkan leikmannahóp og það kemur maður í manns stað."
föstudagur 30. apríl
20:00 Valur-ÍA (Origo völlurinn)
laugardagur 1. maí
17:00 HK-KA (Kórinn)
19:15 Stjarnan-Leiknir R. (Samsungvöllurinn)
19:15 Fylkir-FH (Würth völlurinn)
sunnudagur 2. maí
19:15 Breiðablik-KR (Kópavogsvöllur)
19:15 Víkingur R.-Keflavík (Víkingsvöllur)
Athugasemdir
