![Lengjudeildin](/images/leng_150x150.png)
„Þetta er mjög ánægjulegt. Við vorum að spila á móti virkilega góðu liði. Við hittum á góðan dag, vorum þéttir varnarlega og mjög fljótir fram á við eins og við erum alltaf," sagði Kristján Atli Marteinsson, leikmaður ÍR, eftir 3-0 sigur gegn Aftureldingu í kvöld.
Lestu um leikinn: ÍR 3 - 0 Afturelding
Kristján Atli gekk frá leiknum fyrir ÍR með þriðja markinu sem hann skoraði með vinstri fæti fyrir utan teig. Þetta er annað markið sem hann skorar með vinstri fæti fyrir utan teig í sumar, en hann er réttfættur.
„Þetta er gríðarleg heppni, ótrúlega mikil heppni á bak við þetta. Ég veit ekki hvernig ég fer að þessu, er alltaf jafn hissa," sagði Kristján léttur.
Hann fagnaði marki sínu ekki í kvöld þar sem hann var að skora gegn sínum gömlu félögum.
„Ég passaði mig að fagna ekki. Ég spilaði með Aftureldingu í mörg ár og mér þykir mjög vænt um Aftureldingu. Ég var aldrei að fara að fagna. En ef maður getur skorað og hjálpað liðinu, þá er það bara gaman."
„Ég á Aftureldingu mikið að þakka. Ég var aldrei að fara að fagna, bara aldrei."
Kristján Atli hefur leikið afar vel með ÍR í sumar en hann er á sínu fyrsta tímabili með félaginu.
„Við erum bara í núinu, það er langbest. Eftir að hafa verið í ÍR í svona viku í vetur, þá leið mér eins og ég væri búinn að vera hérna í tíu ár. Þetta er þvílíkt heimilislegt og gott félag. Ég er búinn að vera hérna í nokkra mánuði núna og mér líður eins og ég hafi verið hér í tíu ár. Þetta er svo yndislegt félag. Ég held að orðið 'heimilislegt' sé besta orðið fyrir ÍR," sagði Kristján Atli.
Allt viðtalið má sjá í spilaranum hér að ofan.
Athugasemdir