Framarar steinlágu gegn Lilleström í LSK-höllinni
Fram tapaði fyrir Lilleström, 4-0, í æfingaleik í LSK-höllinni í Lilleström í dag.
Lilleström er eitt af stærstu félögum Noregs og unnið deildina fimm sinnum, en er að ganga í gegnum erfiðan kafla.
Liðið féll úr úrvalsdeildinni á síðasta tímabili og mun því leik í B-deildinni á komandi leiktíð.
Rúnar Kristinsson, þjálfari Fram, var áður þjálfari hjá Lilleström frá 2014 til 2016, en hann fékk nú tækifæri til að snúa aftur á sinn gamla heimavöll.
Lilleström skoraði öll fjögur mörk sín á fjórtán mínútna kafla í fyrri hálfleik. Fyrsta markið var sjálfsmark eftir sendingu Leandro Neto, sem bætti sjálfur við öðru markinu mínútu síðar. Lilleström hamraði járnið meðan það var heitt og var Felix Va næstur í röðinni, sem gerði síðan annað mark sitt sjö mínútum fyrir lok fyrri hálfleiks.
Framarar eru á fullu að undirbúa sig fyrir Bestu deildina en fyrsti leikur þeirra er 6. apríl gegn ÍA á Lambahagavellinum í Úlfarsárdal.
Athugasemdir
