Preston North End og Blackburn Rovers gerðu markalaust jafntefli í 6. umferð ensku B-deildarinnar í dag.

Skagamennirnir Arnór Sigurðsson og Stefán Teitur Þórðarson eru á mála hjá félögunum. Arnór spilar með Blackburn og þá samdi Stefán við Preston í sumar.

Arnór var hins vegar fjarri góðu gamni og ekki í hópnum á meðan Stefán sat allan tímann á varamannabekk Preston.

Dómari leiksins var spjaldaglaður. Níu gul spjöld fóru á loft og tvö rauð, en Sam Greenwood var rekinn af velli í liði Preston undir lok fyrri hálfleiksins áður en Owen Beck, sem er á láni hjá Blackburn frá Liverpool, var vikið af velli undir lok leiksins.

Færin voru á báða bóga en liðunum tókst ekki að koma boltanum í netið. Blackburn er í 4. sæti með 12 stig en Preston í 21. sæti með 5 stig.