HK-ingurinn hafði verið án félags í tvo mánuði áður en hann samdi við Preussen Munster.

Hann lék sinn fyrsta leik í 3-3 jafntefli gegn Paderborn á dögunum en þá kom hann inn á sem varamaður á 73. mínútu og gerði fyrsta mark sitt fimm mínútum síðar.

Hólmbert byrjaði aftur á bekknum í dag en kom við sögu á 56. mínútu og þakkaði aftur fyrir sig með marki fimmtán mínútum síðar, annað mark hans fyrir félagið.

Þetta var fyrsti sigur Munster á tímabilinu en liðið er með fimm stig eftir sex leiki.

Andri Lucas Guðjohnsen, sem hefur farið svolítið brösulega af stað hjá belgíska félaginu Gent, kom inn af bekknum á 72. mínútu í dag og lagði upp fjórða markið í 4-2 sigri á Club Brugge.

Landsliðsmaðurinn hefur komið að tveimur mörkum í tíu leikjum í öllum keppnum með Gent, en eftir leikinn í dag er liðið í 3. sæti með 13 stig.

Atli Barkarson lék allan leikinn í 3-1 sigri Zulte Waregem á RFC Liege í belgísku B-deildinni. Liðið er í öðru sæti með 10 stig eftir fimm leiki.