„1-0 sigrarnir eru bestu sigrarnir, halda hreinu og skora eitt," sagði Halldór Jón Sigurðsson, Donni, þjálfari Þórs eftir 0-1 sigur á Gróttu á Seltjarnarnesinu í dag.
Lestu um leikinn: Grótta 0 - 1 Þór
„Við réðum lofum og lögum og áttum leikinn frá A-Ö, fengum víti í byrjun leiks sem var sárt að skora ekki úr. Það hefði breytt leiknum heldur betur en að sama skapi fannst mér leikurinn heilt yfir ágætlega leikinn. Við getum gert betur en þetta en Gróttu menn eru gríðarlega þéttir, margir fyrir aftan boltann og duglegir og vinnusamir og vel skipulagðir. Þeir gerðu okkur lífið leitt þrátt fyrir að við höfum fengið fjögur dauðafæri plús víti þá skoruðum við mark."
Árni Freyr Ásgeirsson markvörður Gróttu var magnaður í dag og hélt liðinu inni í leiknum allan daginn með prýðisgóðum markvörslum.
„Hann er bara góður. Hann er drullugóður. Þetta er fínasta lið sem á eftir að taka einhver stig í lokin."
Donni sagði svo í lokin að Þór stefni enn á að fara upp í Pepsi-deildina en Þróttur er að gefa eftir og Akureyrarliðin Þór og KA eru næst í deildinni og mætast í lokaumferðinni.
„Við gefumst aldrei upp, það er ennþá hægt. Þróttur var ekki að vinna sinn leik núna, við höldum áfram að reyna að vinna alla okkar leiki og sjá hverju það skilar okkur. Við ætlum að enda þetta tímabil með stæl. En fyrst og fremst hugsum við um næsta leik og að taka öll stigin þar."
„Eins og staðan er núna er það tölfræðilega mögulegt að fara upp og þá gefumst við aldrei upp. Þórsarar gefast aldrei upp og við munum aldrei gefast upp og við höfum allt tímabilið sett okkur það markmið að vinna næsta leik. Þetta er fjarlægur draumur og rosalega erfitt, við höfum gert okkur þetta erfitt."
Athugasemdir
