Spáin fyrir enska - 5. sæti: „Liðið verður enskur meistari!"

Um Newcastle: Lífið breyttist heldur betur hjá stuðningsfólki Newcastle í október 2021 er hinn níski Mike Ashley hvarf á braut og moldríkir eigendur frá Sádí-Arabíu tóku við eignarhaldi félagsins. Nýir eigendur Newcastle eru gríðarlega umdeildir, meðal annars vegna mannréttindabrota í gegnum árin. En yfirtakan fór samt í gegn og það hefur verið gaman fyrir áhangendur Newcastle að fylgjast með liðinu eftir að hún fór í gegn.

Newcastle hefur ekki verið að kaupa neinar stórstjörnur eftir eigendaskiptin, en félagið hefur farið fullkomna leið og byggt upp jafnt og þétt. Liðið spilaði á köflum frábæran fótbolta á síðustu leiktíð og má þar til dæmis nefna heimasigurinn gegn Manchester United þar sem yfirburðirnir voru miklir. Það má segja að liðið hafi verið á undan áætlun með því að ná Meistaradeildarsæti á síðasta tímabili, en liðsheildin er bara orðin það sterk á skömmum tíma. Þriðjudags- og miðvikudagskvöldin verða rafmögnuð á St James' Park í vetur, það er klárt mál. Mun það hafa áhrif á deildina að liðið sé í Meistaradeildinni? Mögulega, breiddin er kannski ekki sú mesta.

Stjórinn: Eddie Howe er líklega einn vinsælasti maðurinn í Newcastle þessa stundina, ef ekki bara sá vinsælasti. Hann gerði á sínum tíma magnaða hluti með Bournemouth og fór svo í smá frí. Hann var kannski ekki heitasti bitinn á markaðnum þegar Newcastle réði hann en hann hefur sýnt það og sannað - aftur - að hann er virkilega fær stjóri. Hann var stjóri tímabilsins í fyrra þar sem hann kom Newcastle í Meistaradeildina en það verður fróðlegt að sjá hversu mikið lengra hann nær að fara með liðið.

Leikmannaglugginn: Newcastle hefur bætt við sig þremur öflugum leikmönnum sem styrkja liðið vel. Maður gerir ráð fyrir enn meiru en það á eftir að koma í ljós.

Komnir:
Sandro Tonali frá AC Milan - 55 milljónir punda
Harvey Barnes frá Leicester - 38 milljónir punda
Tino Livramento frá Southampton - 32 milljónir punda
Yankuba Minteh frá OB - 5,8 milljónir punda

Farnir:
Allan Saint-Maximin til Al-Ahli - 26,8 milljónir punda
Chris Wood til Nottingham Forest - 15 milljónir punda
Karl Darlow til Leeds - 400 þúsund pund
Garang Kuol til Volendam - á láni
Harrison Ashby til Swansea - á láni
Jamal Lewis til Watford - á láni
Ciaran Clark - samningur rann út

Út frá leikmannaglugganum þá er líklegt byrjunarlið svona:


Lykilmenn: Kieran Trippier er fyrsti maður á blað hjá Newcastle. Hann var í liði ársins í fyrra og var hreint út sagt stórkostlegur í bakverðinum. Markvörðurinn Nick Pope var líka frábær í fyrra og hann verður áfram mikilvægur fyrir liðið á komandi tímabili. Hann er stór og stæðilegur markvörður sem er með mikla reynslu úr þessari deild. Þá er miðjumaðurinn Bruno Guimaraes búinn að sýna það og sanna hversu öflugur hann er. Hann verndar vörnina og er frábær leikmaður.

„The Entertainers"
Sigurjón Jónsson er stuðningsmaður Newcastle. Við fengum hann til að svara nokkrum spurningum um liðið og tímabilið sem er framundan.

Ég byrjaði að halda með Newcastle af því að... Minn uppáhaldsleikmaður, Peter Beardsley, skipti yfir til félagsins 1993 og spilamennska liðsins undir stjórn Kevin Keegans á þeim árum heillaði. 'The Entertainers'.

Áttu uppáhalds minningu tengda félaginu þínu? 5-0 sigurinn á Man Utd árið 1996 situr vel í minningunni enda horfði ég á leikinn umkringdur United mönnum. Sömuleiðis þegar Scott Parker lyfti Intertoto bikarnum 2006 eftir hátt í 50 ára eyðimerkugöngu.

Hvernig fannst þér síðasta tímabil? Það var stórkostlegt og langt fram úr björtustu vonum. Hefði viljað sjá okkur enda fyrir ofan Utd en Meistaradeildarsæti og bikarúrslit. Liðið var einstaklega vel skipulagt og baráttan í liðinu til fyrirmyndar. Skemmtilegast fannst mér þegar menn fóru að kvarta yfir leikstíl liðsins og leiktöfum…

Ertu með einhverja sérstaka leikdagshefð? Nei, ég er ekki svo ruglaður.

Hvern má ekki vanta í liðið? Bruno Guimarães er algjör lykilmaður í þessu liði sem lætur það tikka. Hann gleymdist aðeins í umræðunni sem besti leikmaður síðasta tímabils.

Hver er veikasti hlekkurinn? Verð því miður að segja Big Dan Burn, hann á það til að lenda í vandræðum en hefur sloppið furðu vel hingað til.

Þessum leikmanni á að fylgjast með... Elliot Anderson, hef á tilfinningunni að hann muni springa út á þessu tímabili. Áræðinn og klókur leikmaður sem kemur sér alltaf í færi. Hann verður kominn í Fantasy lið ansi margra á næstunni.

Við þurfum að kaupa... Einn hafsent upp á breiddina að gera. Annars er liðið virkilega vel mannað.

Hvað finnst þér um stjórann? Eddie Howe hefur sannað að hann er einn sá færasti í faginu. Viðkunnanlegur í samskiptum og yfirvegaður en á sama tíma alveg grjótharður. Svo hef ég einstaklega gaman af Jason Tindall sem er aðstoðarmaður.

Hvernig líður þér fyrir tímabilinu sem er framundan? Mjög vel, félagið hefur verið mjög skynsamt á félagaskiptamarkaðnum og maður sér greinilega á hvaða vegferð liðið er. Það á að keyra yfir liðin á háu tempói, kantmenn með hraða og hlaupagetu, þéttir til baka og mikil gæði á miðsvæðinu. Wilson og Isak munu svo sjá um að raða mörkunum inn.

Hvar endar liðið? Liðið verður enskur meistari!

Newcastle hefur leik í ensku úrvalsdeildinni laugardaginn 12. ágúst gegn Aston Villa á heimavelli.

---

Þau sem spáðu: Alexandra Bía Sumarliðadóttir, Aksentije Milisic, Anton Freyr Jónsson, Arnar Laufdal Arnarsson, Brynjar Ingi Erluson, Elíza Gígja Ómarsdóttir, Elvar Geir Magnússon, Guðmundur Aðalsteinn Ásgeirsson, Jóhann Þór Hólmgrímsson, Ívan Guðjón Baldursson, Stefán Marteinn Ólafsson og Sverrir Örn Einarsson.

Liðin fengu eitt stig og upp í 20 eftir það hvar hver og einn spáði þeim. Liðið í síðasta sæti fékk eitt stig, liðið í 19. sæti tvö stig og koll af kolli. Stigin í spánni tengjast á engan hátt stigafjölda liðanna í deildinni..

Spáin:
1. ?
2. ?
3. ?
4. ?
5. Newcastle, 186 stig
6. Chelsea, 184 stig
7. Tottenham, 164 stig
8. Aston Villa, 157 stig
9. Brighton, 155 stig
10. West Ham, 130 stig
11. Brentford, 101 stig
12. Crystal Palace, 96 stig
13. Fulham, 81 stig
14. Burnley, 80 stig
15. Wolves, 71 stig
16. Nottingham Forest, 67 stig
17. Everton, 66 stig
18. Bournemouth, 56 stig
19. Sheffield United, 31 stig
20. Luton Town, 16 stig