Heimir Guðjónsson.
Niko Kovac.
Heimir Guðjónsson, þjálfari FH, var gestur í aukaþætti Fótbolta.net á X-inu sem fjallaði einungis um umspilsleik Íslands og Króatíu sem fram fer í kvöld.
Fyrr í þættinum kom Sverrir Þór Sverrisson, betur þekktur sem Sveppi, með skúbb í beinni þegar hann greindi frá því að Alfreð Finnbogason yrði í byrjunarliðinu á meðan vinur hans Eiður Smári Guðjohnsen vermir bekkinn.
„Þetta kemur mér á óvart. Mér fannst mjög líklegt að byrjunarliðið yrði það sama og í síðustu leikjum. Auðvitað spurning hver yrði í hægri bakverðinum en maður hélt að hann myndi ekki hrófla við neinu öðru,“ sagði Heimir í útvarpsþætti Fótbolta.net.
„Þetta kemur líka á óvart í ljósi þess að Eiður Smári er kannski sá leikmaður í liðinu sem hefur mestu reynsluna af svona stórum leikjum, og hann hefur sýnt það í leikjunum í undankeppninni að hann hefur reynst liðinu mjög vel í að halda boltanum og róa leikinn þegar á þarf.“
„Alfreð Finnboga er að sjálfsögðu frábær leikmaður sem ég hef miklar mætur á og hefur staðið sig frábærlega með Heerenveen. Vonandi kemur hann sterkur inn, en eins og ég sagði, þá kemur þetta á óvart.“
„Pælingin hlýtur að vera sú að sækja til sigurs. Ég persónulega myndi halda að það væri sterkt að koma út og pressa Króatana í byrjun. Ég er ekkert viss um að þeir séu klárir í það og ég hélt það myndi koma þeim svolítið á óvart.“
„Það er líka með Alfreð að hann hefur gríðarlegt markanef og þá ertu kominn með tvo menn frammi sem eru mjög líklegir að skora í leiknum. Og ég er nokkuð viss um að við skorum í þessum leik, þetta snýst um að halda búrinu hreinu.“
„Ég held samt að leikskipulagið verði alltaf það sama og að Alfreð muni detta þarna niður, hann hefur spilað þá stöðu áður. Þetta verður fróðlegt, en Sveppi er náttúrulega svo mikill fugl að hann getur verið að rugla, og líka setja þetta upp þannig að koma Króötunum svolítið á óvart.“
„Niko Kovac er núna sveittur alveg að spá í það hvernig eigi að bregðast við þessari frétt áðan,“ sagði Heimir léttur.
Viðtalið má hlusta á í heild sinni hér að ofan, en þar rýndi heimir vel í leikinn.
Athugasemdir
