Siggi í leik gegn Aftureldingu á síðasta tímabili.
„Við erum komnir áfram og það er um það bil eina jákvæða sem tökum úr þessum leik. Við klárum þetta hérna alveg í restina," sagði Sigurður Marínó Kristjánsson, annar af markaskorurum Þórs, eftir sigur gegn Reyni í Mjólkurbikarnum.
Lestu um leikinn: Þór 2 - 1 Reynir S.
Siggi skoraði úr vítaspyrnu þegar skammt var eftir af framlengingunni en staðan var 1-1 að loknum 90 mínútum. Þórsarar sigruðu Völsung í vítaspyrnukeppni fyrir tæpum tveimur vikum. Er spilamennskan í bikarnum áhyggjuefni?
„Það er erfitt að segja nei við þessu en ég ætla samt að gera það. Þetta er bikarinn, önnur keppni. Það er samt ekki alveg nógu gott að geta ekki sýnt okkar rétta andlit í bikarnum."
Reynir hefði með smá heppni getað leitt 0-2 í hálfleik en Þórsarar fengu þó sjálfir færi til að skora undir lok hálfleiksins. Staðan var 0-1 í hálfleik og Siggi var spurður af hverju Þórsurum tókst ekki að koma betur inn í fyrri hálfleikinn.
„Ef ég hefði svarið við því þá hefði það sennilega ekki gerst. Þetta er eitthvað sem menn þurfa að grafa ofan í hver fyrir sig. Menn verða að mæta klárir með hausinn í lagi og bara smá pung, sýna aðeins það sem við stöndum fyrir sem við gerum ekki í dag."
Þórsarar eru komnir í 16-liða úrslit Mjólkurbikarsins. Er Siggi með óskamótherja í bikarnum?
„Já, það er rosalega auðvelt að segja bara KA. Það skiptir ekki öllu máli heima eða úti. Það væri kannski meiri stemning að hafa það á Greifavelli, vinna þá þar."
Siggi skoraði úr vítaspyrnu undir lok leiks og erfitt var að sjá á hvað var dæmt. Siggi segist ekki alveg vita á hvað var dæmt.
„Svo bendir Helgi [dómari leiksins] á punktinn. Þeir segja hendi en ég get ekki svarað því."
Að lokum var Siggi spurður út í dagana fyrir þennan leik en Þór hefur verið mikið milli tannanna á fólki og fengið mikla umfjöllun í fjölmiðlum vegna derhúfna sem leikmenn og þjálfari voru með á höfði sér í viðtölum eftir síðasta leik. Truflaðist undirbúningurinn fyrir þennan leik vegna atburða vikunnar?
„Nei ég get ekki séð það að það hafi einhver áhrif á okkur. Þetta er eitthvað sem stjórnin glímir við. Við höfum haldið okkur algjörlega utan við þessi mál í fjölmiðlum og það á ekki að hafa nein áhrif á okkur. Ef það er samt tilfellið þá er það hjá hverjum og einum að vinna úr því. Það á ekki að hafa nein áhrif."
Athugasemdir
