Leikur sem allir vilja komast í
Á laugardag mætast Breiðablik og Valur í úrslitaleik í Mjólkurbikar kvenna. Breiðablik er ríkjandi bikarmeistari og Valur er að fara í sinn fyrsta bikarúrslitaleik í tíu ár.
Ásmundur Arnarsson, þjálfari Breiðabliks, ræddi við Fótbolta.net um bikarúrslitaleikinn.
Ásmundur Arnarsson, þjálfari Breiðabliks, ræddi við Fótbolta.net um bikarúrslitaleikinn.
„Mér líst vel á þetta verkefni. Þetta er auðvitað leikur sem allir vilja komast í, stærsti leikur á hverju tímabili. Frábært að vera komin í þann leik og spennandi verkefni að spila við Val hér á Laugardalsvelli," sagði Ási.
„Stígur ekki allt saman aðeins upp við að það sé bikarúrslitaleikur? Aðeins meiri umgjörð og allt það. Já það er kannski pínu öðruvísi, þetta er auðvitað bara einn leikur, bikar í boði og allt undir. Það stækkar leikinn, stækkar verkefnið og gerir þetta bara skemmtilegra."
„Við reynum að haga undirbúningi sem næst venjulegum leik. Það er ekkert mikið sem verður öðruvísi."
Ási er á leið inn í sinn þriðja úrslitaleik í bikarnum á ferlinum en hann fór tvisvar með karlalið Fjölnis í úrslitaleik á fyrsta áratugi aldarinnar. Fjölnir tapaði gegn FH 2007 og KR 2008. Getur hann tekið einhverja reynslu úr þeim leikjum?
„Vonandi, vonandi hefur maður einhverja reynslu úr því og getur nýtt sér það og leikmannahópurinn hefur einhverja reynslu úr svona leikjum. Við þurfum að reyna kreista út alla þá reynslu sem við höfum til þess að nýta okkur á þessum degi."
„Ég held að það sé svona að byrja byggjast upp og vonandi verður það passleg spenna. Það var kannski spennufall í síðustu viku þegar við náðum ekki að fara áfram í Meistaradeildinni, svo fer spennan smám saman að byggjast upp fyrir þennan leik og verður vonandi passlegt spennustig á laugardag," sagði Ási.
Viðtalið í heild sinni má sjá í spilaranum að ofan.
Leikurinn hefst klukkan 16:00 á laugardag og fer fram á Laugardalsvelli. Miðasala fyrir leikinn er á tix.is.
Athugasemdir
