Réttarhöldin yfir Benjamin Mendy, fyrrum vinstri bakverði Manchester City og franska landsliðsins, eru hafin.
Mendy og félagi hans eru ásakaðir um að hafa framið fleiri nauðganir yfir nokkurra ára tímabil frá komu Mendy til Englands sumarið 2017.
Mendy hefur lýst yfir sakleysi sínu og bar vitni í réttarhöldunum í dag.
„Ég veit að ég er enginn Brad Pitt en konur reyndu við mig - ekki endilega vegna útlitsins heldur útaf fótboltanum," sagði Mendy meðal annars.
„Kvenfólk hefur sóst í mig síðan ég var 18 ára gamall leikmaður Marseille og sú athygli jókst tífalt þegar ég skipti yfir til Man City sem er eitt af bestu félagsliðum Evrópu.
„Í byrjun var þetta algjör draumur. Ég var að njóta lífstílsins. Ég naut hússins og kvenfólksins. Ég var svo glaður að vera hérna, svo var ég líka spenntur yfir fótboltanum."
Mendy var spurður út í samskipti sín við kvenfólk og þvertók fyrir að hafa gert nokkuð rangt.
„Ég var alltaf opinn og heiðarlegur varðandi það sem ég vildi. Ég hugsaði aldrei með mér að þær gætu orðið leiðar. Ef þær vildu kynlíf og ég vildi kynlíf, þá var þetta ekkert mál. Ég stundaði kynlíf með fjölmörgum konum og oftast voru það þær sem reyndu við mig af fyrra bragði en stundum reyndi ég líka við þær.
„Þegar þær sögðu nei þá var það ekkert mál. Ég samþykkti það og hætti hverju sem var í gangi. Ég vil bara stunda kynlíf með manneskju sem er líka að njóta þess."
Mendy kom einnig inn á það að hann notaði sjaldan smokk í kynlífi og að það hafi verið eðlilegt fyrir hann að sofa hjá tveimur eða fleiri konum á sama kvöldi.
„Ég hef haft tíma til að hugsa um lífið sem ég leiddi. Allt þetta djamm var til að bæla niður sársauka innra með mér."
Mendy kom einnig inn á kynlífsfíknina sína en neitaði að hafa gert nokkuð rangt í samskiptum sínum við kvenfólk. Hann segist ekki hafa gert sér grein fyrir því að hann gæti sært tilfinningar kvenfólks sem væri búið að gefa samþykki fyrir kynlífi.
