Topplið Leeds United tapaði óvænt fyrir Portsmouth, 1-0, í ensku B-deildinni í dag.

Leedsarar höfðu ekki tapað leik síðan í nóvember á síðasta ári og má alveg færa rök fyrir því að liðið hafi verið rænt stigum í dag.

Þegar tæpur stundarfjórðungur var liðinn vildu gestirnir í Leeds fá vítaspyrnu er Matt Ritchie tók Daniel James niður í teignum. Dómarinn var tilbúinn að dæma en hætti við og þá er auðvitað ekkert VAR í B-deildinni og má segja að Portsmouth hafi sloppið með skrekkinn.

Leeds fékk urmul af færum til að taka forystuna en leikplanið hjá Portsmouth gekk þokkalega vel og tókst liðinu að halda út fram að hálfleik.

Joel Piroe fékk algert dauðafæri snemma í síðari hálfleiknum en setti boltann yfir af stuttu færi.

Leeds var refsað fyrir það þegar hálftími var eftir og kom það upp úr engu. Colby Bishop stakk sér inn fyrir Joe Rodon og var kominn á móti Illian Meslier, sem hikaði eitthvað við að fara úr marki. Bishop náði að komast í boltann á undan Meslier og skora með laglegu skoti.

Heildarframmistaða Leeds á tímabilinu hefur verið frábær en franski markvörðurinn hefur hins vegar kostað liðið mörg dýrmæt stig sem gætu reynst dýrkeypt þegar talið verður upp úr pokanum í vor.

Færin voru á báða bóga á lokakaflanum. Junior Firpo átti skalla í þverslá og stuttu seinna gat Portsmouth gert út um leikinn er Josh Murphy reyndi skot en það hafnaði í stöng.

Örvænting greip um sig hjá Leeds í lokin og reyndi liðið allt til að koma til baka en tókst ekki. Fyrsta tap liðsins síðan í lok nóvember en Leedsarar halda toppsætinu með 76 stig á meðan Portsmouth er í 17. sæti með 42 stig.