Það tók Lyngby sautján leiki til að ná í fyrsta sigurinn en liðið hafði gert fimm jafntefli og tapað ellefu.

Léttirinn var því mikill er liðið lagði Silkeborg, 2-0, í dag. Eftir leikinn sagði Freysi við leikmenn að hann myndi kaupa þúsund Carlsberg-bjóra til að fagna tilefninu.

„Þið eruð fokking geggjaðir. Haldiði kjafti hvað þið eruð sterkir strákar. Núna ætla ég bara að segja það. Þið eigið eftir að heyra alls konar hluti um hvað þið spiluðuð ekki það vel og þið hafið spilað mikið af góðum leikjum, en að þið séuð samt ekki það gott lið. Haldiði kjafti, mér er alveg sama. Mér gæti ekki verið meira sama,“ sagði Freysi í klippu sem TV3 birti.

„Núna verðið þið að njóta augnabliksins og fara í rútuna. Ég mun svo kaupa þúsund Carlsberg og þið haldið gott teiti, okei? Það er verðskuldað strákar,“ sagði hann í klefanum eftir leikinn.

Lyngby er á botninum með 8 stig, sex stigum frá Erik Hamrén og félögum í Álaborg.