Það var nóg um að vera í skandinavíska kvennaboltanum í dag þar sem nokkrir Íslendingar komu við sögu.
Í efstu deild í Svíþjóð var Þórdís Elva Ágústsdóttir í byrjunarliði Växjö og skoraði jöfnunarmark í góðum sigri á útivelli gegn Hammarby. Vaxjö vann leikinn 1-2 og er um miðja deild, með 13 stig eftir 9 umferðir.
Ógnarsterkt lið Rosengård trónir þá enn á toppi sænsku deildarinnar eftir níunda sigurinn í röð. Liðið er með fullt hús stiga eftir þægilegan 4-0 sigur gegn Norrköping í dag.
Landsliðskonan öfluga Guðrún Arnardóttir var á sínum stað í hjarta varnarinnar hjá Rosengard í dag.
Í efstu deild danska boltans vann Íslendingalið Bröndby mikilvægan sigur á útivelli gegn Fortuna Hjörring til að endurheimta toppsætið. Bröndby mætir því Nordsjælland í gríðarlega eftirvæntum titilslag í lokaumferðinni og mun líklegast þurfa sigur til að tryggja sér titilinn.
Kristín Dís Árnadóttir og Hafrún Rakel Halldórsdóttir komu saman inn af bekknum á 62. mínútu í sigrinum, þegar staðan var jöfn 1-1. Lokatölur urðu 1-2 fyrir Bröndby.
Emelía Óskarsdóttir og Sunneva Hrönn Sigurvinsdóttir sátu þá allan tímann á sitthvorum bekknum er AGF tók á móti HB Köge. Köge hafði betur eftir fjöruga sjö marka viðureign og á enn veika von um að geta hirt annað sæti deildarinnar sem veitir þátttökurétt í Meistaradeildinni á næstu leiktíð.
Að lokum rúllaði Odense yfir Österbro í fallbaráttunni, þar sem Snædís Lilja Daníelsdóttir varði mark Österbro og fékk sjö mörk á sig á heimavelli. Snædís Lilja er fyrrum markvörður Sindra í 2. deild kvenna. Arna Þráinsdóttir var á bekknum í sigurliði Odense sem er búið að bjarga sér frá falli.
Í norska boltanum var Íris Ómarsdóttir í byrjunarliði Stabæk sem tapaði 1-0 á útivelli gegn Roa. Þá tapaði toppbaráttulið Vålerenga óvænt útileik gegn Lyn, en Sædís Rún Heiðarsdóttir var ekki með.
Hammarby 1 - 2 Vaxjo
1-0. J. Blakstad ('27)
1-1 Þórdís Elva Ágústsdóttir ('35)
1-2 D. Dupuy ('57)
Rosengard 4 - 0 Norrkoping
Uppsala 1 - 2 Jitex
Fortuna Hjorring 1 - 2 Brondby
AGF 3 - 4 HB Koge
Osterbro 1 - 7 Odense
Næstved 0 - 2 B93
Roa 1 - 0 Stabæk
Lyn 2 - 0 Valerenga
Athugasemdir