„Já, þetta var frekar dramatískt," sagði Pétur Pétursson þjálfari Vals eftir sigur á Þór/KA á Akureyri í kvöld. „Þetta var æðislegt hjá okkur í Val að vinna þennan leik. Komnar 1-0 undir en þetta var frábærlega vel klárað hjá okkar stelpum."
Lestu um leikinn: Þór/KA 1 - 2 Valur
„Það var allt svo hægt í fyrri hálfleik og það sama í byrjun seinni hálfleiks, lélegar sendingar, auðvitað hefur grasið eitthvað um það að segja. Þegar við fáum markið á okkur þá kveiknar á okkur," sagði Pétur.
Berglind BJörg Þorvaldsdóttir kom inn á sem varamaður og jafnaði metin en þetta var fyrsta markið hennar á Íslandi í fjögur ár.
„Ég hafði alltaf á tilfinningunni að Berglind Björg myndi skora ef hún myndi koma inn á í dag og ég tala nú ekki um Önnu Björk," sagði Pétur.
Fanndís Friðriksdóttir kom einnig inn á sem varamaður og lagði upp markið á Berglindi en þær spiluðu saman á sínum tíma hjá Breiðabliki.
„Mér fannst þær tengja rosalega vel saman, það er frábært fyrir okkur," sagði Pétur.
Enginn varamarkvörður var til taks á bekknum hjá Val í kvöld.
„Íris kemur í næsta leik. Það hefur verið smá vesen á þessum leikjum, Anna Úrsula hefur verið að leysa þetta af en hún komst ekki í þennan leik. Við vorum tilbúnar með leikmann ef eitthvað myndi breytast í leiknum," sagði Pétur en hann vildi ekki gefa upp hver það væri.
„Ætla ekki að segja það, þori ekki að segja það," sagði Pétur léttur í bragði.
