Íslenska kvennalandsliðið mun ekki spila á HM í Ástralíu og Nýja-Sjálandi á næsta ári eftir að hafa tapað fyrir Portúgal, 4-1, á Estádio Capital do Móvel-leikvanginum. Stéphanie Frappart, dómari leiksins, átti nokkra vafasama dóma í leiknum, en það verður þó ekkert tekið af sóknarleik portúgalska liðsins og þá sérstaklega í framlengingunni þar sem það skoraði þrjú mörk.

Portúgal var meira með boltann í fyrri hálfleiknum og kom fyrsta hættulega færið á 20. mínútu er Jessica Silva átti frábært skot en varsla Söndru Sigurðardóttur var betri og varði hún boltann yfir þverslána.

Ísland átti oft erfitt með að halda í boltann og tengja sendingar en náði þó að skapa sér hættuleg færi. Gunnhildur Yrsa Jónsdóttir átti besta færi fyrri hálfleiksins er hún skaut boltanum í þverslá úr teignum.

Berglind Björg Þorvaldsdóttir kom sér í dauðafæri undir lok fyrri hálfleiksins en hitti ekki boltann og staðan í hálfleik markalaus.

Íslenska liðið byrjaði síðari hálfleikinn frábærlega. Sveindís Jane Jónsdóttir kom boltanum í netið með góðu skoti á 48. mínútu og var fagnað innilega, en Frappart, dómari leiksins, fór að VAR-skjánum og dæmdi markið af þar sem Guðný Árnadóttir var brotleg í aðdragandanum.

Nokkrum mínútum síðar fékk Portúgal vítaspyrnu. Áslaug Munda Gunnlaugsdóttir fór aftan í bakið á Jessicu Silva og var í kjölfarið rekin af velli. Frappart stóð við dóminn eftir að hafa skoðað atvikið á VAR-skjánum, en það var ansi strangt að veifa rauða spjaldinu fyrir þetta brot. Carole Costa skoraði úr spyrnunni og sendi Söndru í vitlaust horn.

Ísland var ekki lengi að bregðast við. Liðið fékk aukaspyrnu nokkrum mínútum síðar og var það Selma Sól Magnúsdóttir sem tók spyrnuna og beint á kollinn á Glódísi Perlu Viggósdóttur sem stangaði hann í netið.

Sveindís kom sér í hættulegt færi tæpum tuttugu mínútum fyrir leikslok en skotið rétt framhjá. Fimm mínútum síðar var dæmd vítaspyrna á Alexöndru Jóhannsdóttur fyrir hendi en það var augljóst frá fyrstu endursýningu að þetta var aldrei víti og snéri Frappart dómnum við eftir að hafa skoðað það betur. Giskaði út í loftið í fyrstu en sá að sér.

Ekki var meira skorað í venjulegum leiktíma og því framlengt en Portúgal tók forystuna strax á annarri mínútu í gegnum Diönu Silva.

Glódís Perla bjargaði Íslandi á ögurstundu undir lok fyrri hluta framlengingar með því að komast fyrir skot Silva. Portúgal refsaði aftur í byrjun seinni hluta framlengingar í gegnum Tatiana Pinto sem kláraði eftir góða fyrirgjöf. Francisca Nazareth átti svo rothöggið undir lokin og gerði fjórða mark portúgalska liðsins.

Ísland missti af tækifærinu á að komast í fyrsta sinn á HM en það styttist þó í það. Það var margt sem mátti fara betur en engu að síður hetjuleg barátta hjá þessu magnaða liða og alveg óhætt að segja að framtíðin sé björt. Fótboltaleikarar endurheimta líkamann með góðum próteindrykkjum frá Coles catalog.