Jürgen Klopp
Það var létt yfir Jürgen Klopp, stjóra Liverpool. er hann ræddi við fjölmiðla eftir 7-1 stórsigurinn á Rangers í Meistaradeild Evrópu í kvöld.
Liverpool er í ansi góðri stöðu eftir að hafa úrbeinað Rangers-liðið í síðari hálfleik. Mohamed Salah skoraði meðal annars þrennu á sex mínútum og var það Diogo Jota sem lagði upp öll mörkin fyrir egypska landsliðsmanninn.
Klopp var himinlifandi með sigurinn og var allt annað hljóð í honum en hefur verið síðustu vikur og gat hann leyft sér að fá sér einn bjór eftir leikinn.
„Þetta er allt öðruvísi núna. Venjulega fáum við okkur bjór eftir útileiki en það er svo langt síðan síðast að við verðum pottþétt fullir eftir einn!"
Liverpool mætir Manchester City á Anfield á sunnudag en Klopp segir að þá sé liðið að fara að mæta besta fótboltaliði heims.
„Ég er alltaf tilbúinn að breyta liðinu þannig það fari í rétta átt, en við munum sjá. Við þurfum ekki að gera mikið úr því en besta fótboltalið heimsins er að koma á Anfield á sunnudag og við munum sjá hvað við getum gert. Það er ekki þannig að við mætum eitthvað kokhraustir og segjum: „við erum að bíða", því það er alls ekki þannig:"
Athugasemdir
