Graham Potter nýr knattspyrnustjóri Chelsea hefur miklar mætur á miðjumanninum Mason Mount.
Potter var gríðarlega ánægður með sinn mann eftir 0-2 sigur gegn Aston Villa um helgina þar sem Mount skoraði bæði mörk leiksins.
„Við höfum mikla trú á Mason Mount. Við elskum hann sem leikmann og manneskju, þetta er frábær strákur. Hann er mikill vinnuhestur og hefur mjög jákvæð áhrif á alla í kringum sig," hafði Potter að segja um leikmanninn.
Mount er 23 ára gamall og skoraði 13 mörk í 53 leikjum með Chelsea á síðustu leiktíð. Hann í heildina 32 mörk í 173 leikjum með Chelsea þrátt fyrir ungan aldur.
Fabrizio Romano greinir frá því að það er algjört forgangsmál hjá stjórnendum Chelsea að framlengja samning Mount við félagið. Hann á aðeins rétt rúmlega eitt og hálft ár eftir af samningnum.
