Efri hluti:
Valur 1 - 3 Breiðablik (20:00 á morgun)
Breiðablik mun ekki tapa leik aftur sem Íslandsmeistari það sem eftir lifir móts. Þeir munu mæta hæfilega peppaðir til leiks og eiga stjörnuleik. Mörk Blika munu koma í öllum regnbogans litum þar sem Damir setur eitt og Ísak Snær með tvennu. Valsarar klóra svo í bakkann í lokin með marki frá Aroni Jóhanns.

Stjarnan 1 - 0 KA (17:00 á sunnudag)
Síðasti heimaleikur Stjörnunnar og það mun vera rífandi stemning á Samsung og leikurinn eftir því. Þetta mun vera hörkuleikur þar sem bæði lið munu sækja stíft en eina mark leiksins mun Guðmundur Baldvin skora, stöngin inn.

Víkingur 1 - 2 KR (19:15 á mánudag)
KR-ingar hafa verið á skriði í síðustu leikjum og munu halda því áfram. Öll mörkin munu verða skrautleg og koma eftir fast leikatriði þar sem íslenskt veðurfar mun setja svip sinn á leikinn. Markaskorarar leiksins verða Kristján Flóki, Atli Sigurjóns og Pablo Punyed.

Neðri hluti:
ÍA 3 - 3 ÍBV (13:00 á morgun)
Markasúpan heldur áfram í leikjum Skagamanna. Blússandi sóknarleikur liðanna mun vera í fyrirrúmi og munu liðin skiptast á því að skora. Öll mörkin munu koma í seinni hálfleik eftir fjölmörg illa nýtt dauðafæri í þeim fyrri. Viktor Jóns mun halda áfram að skora og setja tvennu og Kaj Leo með eitt. Í liði gestanna mun Andri Rúnar skora tvö og síðasta mark leiksins skorar Atli Hrafn.

Leiknir 0 - 0 Keflavík (13:00 á laugardag)
Annað jafntefli mun líta dagsins ljós í þessari umferð og munu liðin skipta stigunum jafnt á milli sín eftir fjörugan leik. Markmenn liðanna munu vera í sviðsljósinu og loka búrinu. Mörg vafaatriði munu vera í leiknum og allt verður á suðupunkti í veðurblíðunni.

Fram 2 - 1 FH (14:00 á sunnudag)
Framarar rífa sig í gang eftir vonbrigði síðustu umferðar og munu vinna sannfærandi sigur á FH-ingum. Gummi Magg gerir alvöru atlögu að markakóngstitlinum en hann og Almarr setja sitthvort markið. FH-ingar lauma inn einu marki í lokin frá Kristni Frey.