„Þetta eru bara mannleg mistök hjá starfsmanni knattspyrnusambandsins. Maður getur ekkert sagt við því þannig en auðvitað þurfum við að setjast yfir það hvernig við ætlum að leysa svona hluti," sagði Þorsteinn jafnramt en það var rætt um málið í útvarpsþættinum Fótbolti.net í dag.

„Það gleymdist að skrá þær, algjört klúður. Þetta er eiginlega bara óafsakanlegt. Við eigum að vera komin það langt að þetta á ekki að geta gerst," sagði Elvar Geir Magnússon.

„Selma er mjög líklega fyrst af bekknum eða önnur," sagði Benedikt Bóas Hinriksson í þættinum en Sævar Atli Magnússon, leikmaður Lyngby í Danmörku, var með þeim í þættinum.

„Ég veit að Kristín Dís átti að fá hlutverk í þessum leik. Hún var eiginlega eini hreinræktaði varnarmaðurinn á bekknum. Þetta var mjög leiðinlegt fyrir þær báðar, alveg skelfilegt," sagði Sævar Atli.

Leikurinn var gríðarlega mikilvægur og mjög jafn, en það gerði mistökin enn verri.

„Í svona mikilvægum leik og svona jöfnum leik geta minnstu smáatriði skipt sköpum, hvort þú vinnir eða gerir jafntefli," sagði Elvar Geir.

„Það má ekki vera algjör meðvirkni við því að fólk geri mistök. Í svona... þetta er eins og flugstjóri að klessa á fjall nánast. 'Æi, hann er ógeðslega góður drengur'. Þetta er þitt starf," sagði Benedikt Bóas að lokum en hægt er að hlusta á allan þáttinn í heild sinni hér fyrir neðan.

Ísland mætir Austurríki aftur á þriðjudaginn, en þá verða vonandi allir 23 leikmennirnir í hópnum. Leikurinn gæti verið úrslitaleikur um það hvort Ísland fari beint á EM 2025 eða ekki, og það er vonandi að landsmenn muni fjölmenn á völlinn til að styðja við bakið á stelpunum okkar.