ÍBV mun leika áfram í Bestu deildinni eftir að liðið tryggði sæti sitt með 3-1 sigri á Fram í Úlfarsárdal í dag. Þessi úrslit þýða það að ÍA er svo gott sem fallið niður um deild.

Eyjamenn vissu það fyrir leikinn að sigur myndi tryggja áframhaldandi veru í deildinni og var liðið því staðráðið í að ganga frá Frömurum.

Sigurður Arnar Magnússon skoraði fyrir ÍBV strax á 2. mínútu eftir að hann vann boltann ofarlega á vellinum og þrumaði honum í markið.

ÍBV fékk vítaspyrnu á 23. mínútu leiksins eftir að Jesus Yendis tók Guðjón Erni Hrafnkelsson niður í teignum. Eiður Aron Sigurbjörnsson fór á punktinn en spyrna hans var arfaslök og varði Ólafur Íshólm Ólafsson nokkuð örugglega.

Sigurður Arnar tvöfaldaði forystuna fyrir Eyjamenn sjö mínútum síðar. Arnór Breki Gunnarsson vann boltann á miðsvæðinu, keyrði að marki og lét vaða, en Ólafur varði í stöng. Sigurður mætti á ferðinni, tók frákastið og skilaði boltanum í markið.

Þremur mínútum síðar gerði Halldór Jón Sigurður Þórðarson þriðja markið. Felix Örn Friðriksson átti góða sendingu á Halldór sem skoraði með skoti í slá og inn. Eyjamenn að ganga frá Frömurum.

Framarar fóru að sækja í sig veðrið í þeim síðari. Fred var nálægt því að minnka muninn en tilraun hans var bjargað á línu og þá átti Guðmundur Magnússon skalla í stöng áður en Eiður Aron bjargaði gestunum.

Markið hjá Fram kom á endanum. Þórir Guðjónsson skoraði með hörkuskalla eftir hornspyrnu. Fjórum mínútum síðar vildi ÍBV fá vítaspyrnu er Telmo Castanheira féll í teignum eftir viðskipti sín við Þóri, en ekkert dæmt.

Fram kom boltanum í netið undir lok leiksins en Jannik Pohl var dæmdur rangstæður.

Framarar náðu ekki að gera meiri spennu úr þessum leik og fór það svo að ÍBV vann, 3-1. Þetta þýðir að ÍBV er með 29 stig og fer liðið upp fyrir Fram í 2. sæti neðri hlutans. ÍBV er því búið að bjarga sér frá falli og skilur því FH, Leikni og ÍA eftir í fallbaráttunni.

Fram er í 3. sæti neðri hlutans með 28 stig og búið að bjarga sér frá falli þegar tvær umferðir eru eftir.