Stefán Teitur Þórðarson lék allan leikinn á hægri kanti Silkeborg sem gerði 3-3 jafntefli við Randers í efstu deild danska boltans í dag.
Stefán Teitur og félagar eru í fjórða sæti eftir jafnteflið fjöruga þar sem Silkeborg leiddi 3-1 í leikhlé en gestirnir komu til baka eftir leikhlé. Silkeborg er með 21 stig eftir 13 umferðir, fjórum stigum eftir toppliði Nordsjælland.
Sverrir Ingi Ingason var þá í byrjunarliði PAOK sem vann frækinn útisigur á Olympiakos í efstu deild í Grikklandi.
Sverrir Ingi lék allan leikinn í hjarta varnarinnar er PAOK vann 1-2. James Rodriguez gerði eina mark heimamanna í Olympiakos sem óðu í færum og voru óheppnir að skora ekki meira.
PAOK fer uppfyrir Olympiakos og í fjórða sæti grísku deildarinnar með þessum sigri. Þar er liðið með 15 stig eftir 8 umferðir, einu stigi meira en Olympiakos.
Hörður Björgvin Magnússon og félagar í Panathinaikos tróna á toppinum með fullt hús stiga, eða 24 stig.
Silkeborg 3 - 3 Randers
1-0 S. Jörgensen ('3)
1-1 D. Hoegh ('8)
2-1 B. Kopplin ('16, sjálfsmark)
3-1 S. Jörgensen ('42)
3-2 M. Egho ('65)
3-3 A. Kamara ('91)
Olympiakos 1 - 2 PAOK
0-1 Sokratis Papastathopoulos ('8, sjálfsmark)
1-1 James Rodriguez ('37)
1-2 Khaled Narey ('56)
Í Svíþjóð mættust Böðvar Böðvarsson og Valgeir Valgeirsson í B-deildinni og úr varð hörkuviðureign. Böðvar og félagar í Trelleborg stóðu uppi sem sigurvegarar eftir dramatískar lokamínútur gegn Örebro.
Trelleborg leiddi 1-0 og missti mann af velli á 90. mínútu en gestirnir úr Örebro jöfnuðu þremur mínútum síðar. Það sakaði ekki því Mouhammed-Ali Dhaini var mættur til að tryggja sigur heimamanna.
Trelleborg er fimm stigum frá þriðja sætinu þegar þrjár umferðir eru eftir og vonir liðsins um að komast upp í efstu deild því ekki bjartar.
Trelleborg 2 - 1 Örebro
Að lokum töpuðu Skeid og Raufoss leikjum sínum í B-deild norska boltans. Skeid endar í þriðja neðsta sæti og á úrslitaleik framundan um sæti í deildinni. Skeid mætir þriðja besta liðinu úr C-deildinni í úrslitaleik um sæti í B-deild.
Hinn efnilegi Pálmi Rafn Arinbjörnsson var ónotaður varamaður í 3-0 tapi gegn Brann í dag. Pálmi Rafn er varamarkvörður hjá Skeid.
Arnar Thór Guðjónsson var ónotaður varamaður í 0-3 tapi Raufoss gegn KFUM Oslo. Raufoss siglir lygnan sjó um miðja deild.
Róbert Orri Þorkelsson var einnig ónotaður varamaður þegar CF Montreal vann gegn Orlando City í úrslitakeppni MLS deildarinnar í nótt. Montreal mætir annað hvort New York City eða Inter Miami í 8-liða úrslitum.
Brann 3 - 0 Skeid
Raufoss 0 - 3 KFUM Oslo
Montreal CF 2 - 0 Orlando City
