Haukar fögnuðu meistaratitlinum í 2. deild kvenna með því að vinna Einherja, 4-0, í næst síðustu umferð deildarinnar í dag.

Haukaliðið varð meistari í gær eftir að Völsungur gerði 3-3 jafntefli við ÍH.

Liðið fagnaði deildartitlinum á Vopnafirði og þar var boðið upp á sýningu.

Ragnheiður Tinna Hjaltalín skoraði fyrsta markið á 12. mínútu, en þær spiluðu gegn tíu leikmönnum síðasta klukkutímann eftir að Ásdís Fjóla Viglundsdóttir fékk að líta rauða spjaldið í liði Einherja.

Elísabet Ósk L. Servo Ólafíudóttir bætti við öðru snemma í síðari hálfleik áður en Ragnheiður Tinna fullkomnaði þrennu sína með tveimur mörkum á síðasta hálftímanum.

Haukar eru nú með 50 stig, átta stigum meira en KR og Völsungur, þegar ein umferð er eftir. KR er í öðru sætinu á markatölu og fær auðveldari viðureign í lokaumferðinni, en liðið mætir Einherja á meðan Völsungur spilar við meistaralið Hauka.