Íslands- og bikarmeistarar Víkings unnu sannfærandi 4-0 sigur á Stjörnunni í 12. umferð Bestu deildar karla á Samsung-vellinum í Garðabæ í kvöld. KR og Fylkir gerðu 2-2 jafntefli á Meistaravöllum, en Fylkismenn komu tvisvar til baka í baráttuleik.
Ekki tók það Víkinga langan tíma að taka öll völd í Garðabæ. Fyrst hótaði Erlingur Agnarsson marki á 6. mínútu en setti boltann framhjá etir sendingu Danijel Dejan Djuric.
Danijel átti stórleik í liði Víkinga. Hann lagði upp fyrsta markið fyrir Nikolaj Hansen á 10. mínútu. Danijel keyrði upp vinstri vænginn, kom boltanum á Hansen sem stýrði honum í netið. Einhverjir Stjörnumenn kölluðu eftir broti Danijels á Óla Val Ómarssyni í aðdragandanum en markið stóð.
Karl Friðleifur Gunnarsson gerði annað markið á 22. mínútu eftir sendingu frá Matthíasi Vilhjálmssyni. Karl fagnaði að hætti enska landsliðsmannsins Cole Palmer. Víkingar komnir með þægilega forystu og gat Danijel bætt við þriðja en skot hans hafnaði í stöng um tíu mínútum fyrir lok fyrri hálfleiks.
Snemma í þeim síðari átti Danijel annað stangarskot. Allt að ganga upp hjá honum í leiknum, nema kannski að klára færin.
Átta mínútum eftir færið lagði hann upp annað mark sitt í leiknum þegar hann kom með stórkostlega fyrirgjöf frá hægri og inn í teiginn á Helga Guðjónsson sem skoraði með frábæru utanfótarskoti efst í hægra hornið.
Danijel gerði þriðju stoðsendingu sína í leiknum á 78. mínútu leiksins. Hann keyrði á vörn Stjörnumanna, sendi hann á milli þeirra og til Helga sem afgreiddi boltann snyrtilega í netið.
Gæðamunurinn á liðunum svakalegur í kvöld. Víkingar með 30 stig í efsta sæti deildarinnar og fjögurra stiga forystu á Breiðablik, en Stjarnan dettur niður í 7. sæti með 16 stig.
Sterkt stig hjá Fylki
KR og Fylkir gerðu 2-2 jafntefli í hörkuleik á Meistaravöllum, en gestirnir komu tvisvar til baka.
Leikurinn bauð ekki upp á mörg færi fyrsta hálftímann eða svo. KR-ingar voru alltaf líklegri til að gera fyrsta markið og kom það þegar um átta mínútur voru eftir af fyrri hálfleik.
Aron Sigurðarson kom með boltann frá vinstri og á ennið á Kristjáni Flóka Finnbogasyni. Boltinn var lengi á leið í markið og leit Ólafur Kristófer Helgason, markvörður Fylkis, ekkert sérlega vel í markinu.
KR-ingar byrjuðu síðari hálfleikinn sterkt en náðu ekki að nýta sér það. Fylkismenn refsuðu með jöfnunarmarki á 51. mínútu er Birkir Eyþórsson kom með fyrirgjöfina á Þórodd Víkingsson, sem kom boltanum í netið.
Gestirnir fengu mark strax í andlitið. Aron Sigurðar með sendingu á fjærstöngina. Kristján Flóki virtist vera að missa af boltanum en náði að koma hausnum í hann og koma KR-ingum í 2-1.
Tæpum tuttugu mínútum fyrir leikslok jöfnuðu Fylkismenn í annað sinn. Varamaðurinn Ómar Björn Stefánsson lék á varnarmann áður en hann lagði boltann á Nikulás Val Gunnarsson sem kláraði í autt markið.
Þegar fimm mínútur voru eftir af venjulegum leiktíma gátu KR-ingar tekið öll stigin. Alex Þór Hauksson kom með frábæran bolta á fjær á Axel Óskar Andrésson. Hann setti boltann fyrir á Finn Tómas Pálmason sem skaut yfir úr frábæru færi.
Liðin sættust á að deila stigunum í Vesturbæ. KR er með 13 stig í 8. sæti en Fylkir áfram í botnsætinu með 8 stig.
Úrslit og markaskorarar:
Stjarnan 0 - 4 Víkingur R.
0-1 Nikolaj Andreas Hansen ('10 )
0-2 Karl Friðleifur Gunnarsson ('22 )
0-3 Helgi Guðjónsson ('58 )
0-4 Helgi Guðjónsson ('78 )
Lestu um leikinn
KR 2 - 2 Fylkir
1-0 Kristján Flóki Finnbogason ('37 )
1-1 Þóroddur Víkingsson ('51 )
2-1 Kristján Flóki Finnbogason ('52 )
2-2 Nikulás Val Gunnarsson ('72 )
Lestu um leikinn
Besta-deild karla
Lið | L | U | J | T | Mörk | mun | Stig |
---|---|---|---|---|---|---|---|
1. Víkingur R. | 13 | 9 | 3 | 1 | 32 - 13 | +19 | 30 |
2. Breiðablik | 13 | 8 | 2 | 3 | 27 - 15 | +12 | 26 |
3. Valur | 13 | 7 | 4 | 2 | 32 - 18 | +14 | 25 |
4. ÍA | 12 | 6 | 2 | 4 | 24 - 17 | +7 | 20 |
5. FH | 12 | 6 | 2 | 4 | 22 - 21 | +1 | 20 |
6. Fram | 12 | 4 | 4 | 4 | 18 - 18 | 0 | 16 |
7. Stjarnan | 13 | 5 | 1 | 7 | 24 - 28 | -4 | 16 |
8. KR | 12 | 3 | 4 | 5 | 22 - 24 | -2 | 13 |
9. HK | 12 | 4 | 1 | 7 | 15 - 23 | -8 | 13 |
10. KA | 12 | 3 | 2 | 7 | 19 - 28 | -9 | 11 |
11. Vestri | 12 | 3 | 1 | 8 | 15 - 31 | -16 | 10 |
12. Fylkir | 12 | 2 | 2 | 8 | 18 - 32 | -14 | 8 |
Athugasemdir