Fram vann sinn fyrsta sigur í Bestu deild karla síðan í byrjun maí er það lagði Vestra að velli, 3-1, á Kerecis-vellinum á Ísafirði.

Bæði lið voru án lykilmanna. Kyle McLagan og Alex Freyr Elísson voru í banni hjá Fram og þá voru þeir Vladimir Tufegdzic og Ibrahima Balde í banni hjá Vestra.

Vestri var að spila annan leik sinn á heimavelli á þessu tímabili og var byrjun heimamanna ágæt. Það má segja að það hafi verið gegn gangi leiksins þegar Magnús Þórðarson kom Frömurum í 1-0 á 16. mínútu.

Elvar Baldvinsson gaf boltann frá sér á vondum stað. Tiago kom boltanum inn á Fred sem var einn á móti William Eskelinin, en í stað þess að skjóta lagði hann boltann til hliðar á Magnús sem skoraði.

Framarar tók völdin og var það Már Ægisson sem tvöfaldaði forystuna á 38. mínútu. Ólafur Íshólm Ólafsson, markvörður Fram, kom boltanum fram og var það Elvar sem potaði honum einhvern veginn inn fyrir á Má sem skoraði af miklu öryggi.

Brynjar Gauti Guðjónsson gerði endanlega út um leikinn með þriðja markinu í byrjun síðari hálfleiks. Eftir smá klafs í teignum var Brynjar fyrstur að átta sig með því að setja boltann í markið.

Fred og Magnús fengu báðir færi til að bæta við forystuna en Eskelinen gerði vel að sjá við þeim í einn á einn stöðu. Svíinn mætti til leiks, en ekki hægt að segja það sama um liðsfélaga hans sem voru ekki á sömu bylgjulengd.

Varamaðurinn Andri Rúnar Bjarnason gerði sárabótamark fyrir Vestra á síðustu sekúndum í uppbótartíma síðari hálfleiks er hann fékk háan bolta inn í teiginn og kláraði listavel í vinstra hornið.

Öruggur og langþráður sigur Fram á Vestra staðreynd. Framarar eru með 16 stig í 7. sæti en það gætu farið upp um sæti ef Stjarnan tapar fyrir Víkingi. Staðan þar er 2-0 fyrir Víkingum. Vestri er á meðan í 10. sæti með 10 stig.