Nik Anthony Chamberlain, þjálfari Þróttar R., var ánægður með 4-2 sigurinn á Aftureldingu en þó ekkert alltof sáttur með frammistöðuna er liðin áttust við í Bestu deild kvenna í kvöld.
Lestu um leikinn: Þróttur R. 4 - 2 Afturelding
Þróttarar skoruðu fjögur mörk á fyrstu 32 mínútum leiksins en þrátt fyrir öll þessi mörk þá fannst honum vanta eitthvað upp á frammistöðuna.
„Við vorum ekkert sérstaklega góðar í leiknum. Við komumst bara í gegn og þær gerðu mistök í vörninni og við nýttum það. Við komumst 4-0 yfir en byrjun seinni var djöfullegt," sagði Nik við Fótbolta.net.
Afturelding byrjaði seinni hálfleikinn með því að skora tvö mörk á nokkrum mínútum.
„Ég veit ekki af hverju við sendum boltann á markvörðinn tvisvar, við gerum það aldrei. Þær verða að taka ábyrgð og fatta það að drepa leikinn og ekki gefa þeim von en við gáfum þeim von og gerðum okkur erfitt fyrir."
„Ég sagði við þær í hálfleik að gefa ekki skítamörk á okkur. Ég vil frekar halda þetta út og ekki gefa þeim von. Eftir tvær mínútur er staðan 4-1 og tveimur mínútum síðar er 4-2, Allt í einu var þetta orðið að baráttu sem átti aldrei að verða."
Hann er þó nokkuð ánægður með byrjun tímabilsins og þungu fargi létt eftir að ná í fyrsta sigurinn snemma móts.
„Leikurinn gegn Val var góður en við náðum bara ekki að skapa okkur neitt fram á við. Þetta var ekkert sérstakt í dag en við erum stundum svolítið stressaðar heima en það er gott að fá sigur snemma móts því það tekur okkur oft fjóra eða fimm leiki að gera það, þannig þetta var gott," sagði hann ennfremur en viðtalið má sjá í heild sinni hér fyrir ofan.
Athugasemdir