Villarreal og Athletic gerðu markalaust jafntefli í lokaleik dagsins í La Liga á Spáni.

Leikurinn var mikilvægur fyrir bæði lið sem eru í baráttu um Meistaradeildarsæti.

Heimamenn voru ívið betri aðilinn í fyrri hálfleik og fóru illa með nokkur góð færi á meðan Athletic fékk tvö færi.

Bæði lið misstu menn í meiðsli. Yuri Berchiche meiddist í fyrri hálfleik hjá Athletic og þá fór Tajon Buchanan af velli hjá Villarreal eftir hressilega tæklingu.

Thierno Barry, framherji Villarreal, fékk besta færið í síðari hálfleik er hann fékk boltann einn á móti opnu marki, en misreiknaði færið hrikalega. Hann bjóst aldrei við að fá boltann þar sem varnarmenn Athletic voru líklegir til að taka á móti honum og brást honum því bogalistin.

Stuttu eftir það kom hann boltanum í netið og fagnaði gríðarlega, en komst síðar að því að markið fengið ekki að standa þar sem hann handlék boltann í aðdragandanum.

Á lokamínútum leiksins fékk Papa Gueye að líta rauða spjaldið í liði Villarreal fyrir ljóta tæklingu. Athletic fékk eitt gott færi einum fleiri er Dani Vivian stangaði boltann í átt að marki en Junior Reis varði frábærlega.

Markalaust jafntefli niðurstaðan og Athletic áfram í 4. sæti með 54 stig en Villarreal í sætinu fyrir neðan með 48 stig. Villarreal á leik inni og góður möguleiki þar að setja meiri spennu í Meistaradeildarbaráttuna.