Mikel Oyarzabal, fyrirliði Sociedad, og Sergio Gomez komu gestunum í 2-0 áður en Skotinn Oli McBurnie minnkaði muninn fyrir heimamenn.

Landsliðsfyrirliðinn Orri Steinn Óskarsson kom inn af bekknum hjá Sociedad eftir mark McBurnie og lék síðasta hálftímann, en á þeim tíma tókst Jon Aramburu að gulltryggja sigur Sociedad.

Sociedad er í 8. sæti með 41 stig og nú sjö stigum frá Evrópusæti þegar átta umferðir eru eftir.

Pablo Barrios var hetja Atlético í 2-1 sigrinum á Sevilla með marki á þriðju mínútu í uppbótartíma.

Lucien Agoume kom Sevilla yfir á 7. mínútu en Julian Alvarez jafnaði úr víti átta mínútum síðar. Barrios tók málin í sínar hendur undir lokin og skoraði gott mark eftir flott einstaklingsframtak.

Atlético er í 3. sæti með 60 stig, þremur stigum frá Real Madrid sem er í öðru sæti.

Ramon Terras skoraði tvennu í 4-0 sigri Getafe á Real Valladolid en heimamenn í Valladolid spiluðu manni færri allan seinni hálfleikinn eftir að Mario Martin fékk að líta rauða spjaldið.

Valladolid er áfram á botninum með 16 stig og styttist í að fall liðsins verði staðfest en Getafe er í 11. sæti með 39 stig.

Las Palmas 1 - 3 Real Sociedad
0-1 Mikel Oyarzabal ('5 )
0-2 Sergio Gomez ('56 )
1-2 Oli McBurnie ('60 )
1-3 Jon Aramburu ('68 )

Sevilla 1 - 2 Atletico Madrid
1-0 Lucien Agoume ('7 )
1-1 Julian Alvarez ('25 , víti)
1-2 Pablo Barrios ('90 )

Valladolid 0 - 4 Getafe
0-1 Mauro Arambarri ('1 )
0-2 Ramon Terrats ('19 )
0-3 Ramon Terrats ('38 )
0-4 Domingos Duarte ('80 )
Rautt spjald: Mario Martin, Valladolid ('45)