Brasilíumaðurinn kom til Real Madrid árið 2006 frá Sao Paulo og þótti einn mest spennandi hægri bakvörður heims á þeim tíma en hann meiddist illa í byrjun leiktíðar og missti mikið úr.

Hann drakk heiftarlega á Spáni og mætti jafnvel fullur á æfingar en hann segir frá þessu í viðtali í sjónvarpsþættinum Ressaca á EPTV.

Drykkjan hélt áfram hjá Roma og missti hann traustið frá liðsfélögunum eftir að þeir sáu hann í annarlegu ástandi.

„Ef þú spyrð mig hvort ég hafi mætt fullur á æfingar hjá Real Madrid þá svara ég því játandi. Ég drakk kaffi til að eyða lyktinni og baðaði mig í rakspíra."

„Þetta var frekar auðvelt, svona ef ég tala sem fyrrum atvinnumaður í knattspyrnu. Ég þurfti ekki pening til að drekka þvi fólk var tilbúið að gefa manni hvað sem er á veitingastöðunum."

„Ég byrjaði að drekka eftir æfingar. Ég fór í endurhæfingu, kom heim um tvö og hætti ekki að drekka fyrr en fjögur um morguninn."

„Í hvert einasta sinn sem ég mætti fullur á æfingar hjá Roma þá sáu leiðtogarnir það og ég missti traustið," sagði hann ennfremur.

Cicinho spilaði 15 landsleiki fyrir Brasilíu og skoraði 1 mark en hann lagði skóna á hilluna fyrir fjórum árum.