Leiknir R. og Stjarnan gerðu 3-3 jafntefli í A-deild Lengjubikarsins í kvöld en leikurinn fór fram á Leiknisvelli.

Vuk Oskar Dimitrijevic kom Leiknismönnum yfir strax í upphafi leiks áður en Guðmundur Steinn Hafsteinsson jafnaði metin þremur mínútum síðar eftir klafs í teignum.

Á 21. mínútu kom hann síðan Stjörnumönnum yfir eftir hornspyrnu áður en Ingólfur Sigurðsson jafnaði fyrir Leiknismenn á 62. mínútu. Þórarinn Ingi Valdimarsson hafði fengið að líta rauða spjaldið í liði Stjörnunnar tíu mínútum fyrir markið.

Hilmar Árni Halldórsson skoraði fyrir Stjörnuna á 75. mínútu gegn sínum gömlu félögum svo áður en Sævar Atli Magnússon náði í stig fyrir Leikni undir lokin.

Lokatölur 3-3 en Stjarnan er með 7 stig í 2. sæti í riðli 1 á meðan Leiknir er með 4 stig í 5. sæti. Þetta var síðasti leikur beggja liða í riðlakeppninni.