Kieran McKenna, stjóri Ipswich Town, mætti sínu gamla félagi, Manchester United, í fyrsta sinn síðan hann yfirgaf það fyrir þremur árum.
McKenna var í þjálfarateyminu hjá Jose Mourinho, Ole Gunnar Solskjær og Ralf Rangnick áður en hann tók við Ipswich Town.
Hann stýrði Ipswich upp um tvær deildir á tveimur árum og fékk tækifærið til að mæta sínu gamla félagi í ensku úrvalsdeildinni í gær.
Ipswich tókst að taka stig af United þökk sé marki Omari Hutchinson en McKenna var mjög ánægður með frammistöðu sinna manna.
„Við hefðum getað unnið leikinn. Við vorum með algera stjórn í lok fyrri hálfleiks og áttum að minnsta kosti skilið að jafna leikinn. Mikil barátta einkenndi síðari hálfleikinn og fengum við nokkur stór færi, en við þurfum að sýna aga í varnarleiknum. Á öðrum degi hefðum við tekið sigur en þeir hefðu líka getað keyrt yfir okkur eftir að við fengum mark á okkur snemma leiks, þannig ég verð að hrósa leikmönnunum.“
McKenna vildi ekki að leikurinn myndi snúast um hann og sögu hans hjá United.
„Allir þekkja sögu mína með þessu félagi, en dagurinn snerist um Ipswich, leikmennina og stuðningsmennina, sem fengu Man Utd í heimsókn á leikvanginn í fyrsta sinn í 22 ár. Mér fannst þeir bera sig vel gegn þeim,“ sagði McKenna.
Athugasemdir
