"Þetta er miklu skemmtilegra þegar fólk mætir og styður okkur. Við Heimir erum náttúrulega góðir félagar og höfum mæst marg oft. Við þekkjum hvorn annan nokkuð vel. Þetta verða oft nokkurskonar refskákir og úr varð ein slík í dag," sagði Rúnar Kristinsson, þjálfari KR, eftir 1-0 sigur gegn FH í kvöld.
Lestu um leikinn: KR 1 - 0 FH
"Stefán kom inn og gerði ofboðslega vel fyrir okkur. Svo kemur Luke inn og við færum Stefán upp á topp. Þeir tveir bjuggu til þetta mark upp á eigin spýtur. Það er ofboðslega gaman að Luke sé loksins búinn að setja mark sitt á leik fyrir okkur KR-inga því hann er búinn að fá nokkur tækifæri til þess í sumar en ekki nýtt þau næginlega vel. Í dag vinnum við á marki frá honum sem er kærkomið."
Í stöðunni 0-0 varði markvörður KR víti sem Rúnar vill meina að hafi lagt grunninn að sigrinum.
"Simen ver glæsilega úr vítinu og frákastinu. Við erum með góðan markmann í honum og Aroni. Simen í rauninni vinnur fyrir okkur þrjú stig í dag með þessari vörslu. Þetta kom með auka kraft og aukna trú fyrir síðustu mínúturnar. Markmenn geta bæði unnið og tapað leikjum fyrir mann en núna vann hann leikinn fyrir okkur. "
Nokkrir leikmenn KR voru fjarverandi í kvöld vegna magapestar. Er einhver hópsýking í gangi?
"Já því miður kom upp einhver sýking. Jóhannes missti allt út úr sér í dag og Olav Öby tilkynnti okkur það sama rétt fyrir leik. Sigurður Bjartur hefði ekki spilað vegna meiðsla en það fer líka allt í klósettið hjá honum. Þetta er ekki gott og við erum að reyna að stía leikmönnum í sundur. Við vorum komnir með sprittbrúsana á loft sem við vorum með í Covidinu og pössum að leikmenn séu ekki að hittast. Við gefum þeim frí á morgun og reynum að halda þeim í sundur svo við missum ekki fleiri í veikindi."
Samkvæmt upplýsingum Fótbolta.net virðast menn hafa veikst eftir að liðið fékk sér súpu saman í aðdraganda leiksins.
Félagaskiptaglugginn opnaði í dag. Sögusagnir hafa verið uppi um að Grétar Snær Gunnarsson og Aron Snær Friðriksson séu á förum frá KR. Á Rúnar von á miklum breytingum? "Nei ég á ekki von á breytingum Grétar er eina spurningamerkið. Að öðru leyti er enginn á leið út frá okkur af þeim leikmönnum sem eru að spila reglulega. Það fara kannski einhverjir ungir leikmenn í KV eða eitthvað slíkt. Aron er ekki að fara neitt. Grétar er eini leikmaðurinn sem gæti farið. Ef FH fær leyfi til að sækja hann núna þá fer hann. Ef ekki verður hann bara hjá okkur nema einhver vilji fá hann lánaðan.
En koma leikmenn inn? "Við höfum verið í einstaka viðræðum en það er erfitt á þessum tímapunkti."
Allt viðtalið við Rúnar má sjá í spilaranum hér að ofan.
