Bruno Fernandes spjallaði við Sky Sports eftir lokaflautið í 1-1 jafntefli Manchester United á útivelli gegn Chelsea.
Man Utd fékk betri færi í leiknum en tókst ekki að nýta þau og tók Chelsea forystuna með marki úr vítaspyrnu á 87. mínútu.
„Við fengum góð færi í fyrri hálfleik og hefðum getað verið tveimur mörkum yfir. Svo skora þeir úr vítaspyrnu undir lokin en við héldum áfram að berjast og náðum í stigið. Við erum sáttir með endurkomuna þó að markmiðið hafi alltaf verið að sækja sigur hingað í dag," sagði Fernandes.
„Við klúðruðum bestu færum leiksins og svo fengu þeir þessa vítaspyrnu. Ég sagði við dómarann að í ensku úrvalsdeildinni væri þetta venjuleg snerting innan vítateigs en ég sá ekki atvikið. Scott sagðist ekki hafa haldið í hann, ég veit ekki með þetta."
Sem betur fer fyrir Rauðu djöflana tókst Casemiro að gera jöfnunarmark með frábærum skalla í uppbótartíma eftir fyrirgjöf frá Luke Shaw. Góðvinur hans Cristiano Ronaldo var ekki í hóp í dag vegna agabanns og tjáði Fernandes sig um stórstjörnurnar.
„Þetta var frábær skalli hjá Casemiro. Við vitum að hann getur þetta, hann skoraði nokkur svona á tíma sínum hjá Real Madrid. Þetta var stórkostlegt mark.
„Við tölum ekki um Ronaldo, við höldum því innan hópsins. Þetta er innanhússmál, það þarf enginn annar að vita hvað er í gangi hjá okkur. Það mikilvægasta fyrir alla, Ronaldo meðtalinn, er að liðinu gangi vel."
Man Utd er í fimmta sæti ensku úrvalsdeildarinnar, með 20 stig eftir 11 umferðir.
