Brynjar Ingi Bjarnason spilaði nánast allan leikinn er Vålerenga tapaði þriðja deildarleiknum í röð í norska boltanum.
Vålerenga heimsótti Odd til Grenland og lenti tveimur mörkum undir. Lokatölur urðu 2-1 og á Vålerenga ekki lengur raunhæfa möguleika á Evrópusæti, með 42 stig úr 27 umferðum.
Ari Leifsson var þá fjarverandi vegna meiðsla og gat ekki tekið þátt í 1-1 jafntefli Strömsgodset gegn Ham-Kam.
Strömsgodset siglir lygnan sjó eftir jafnteflið, tíu stigum frá fallsæti þegar fjórar umferðir eru eftir.
Odd 2 - 1 Vålerenga
Ham-Kam 1 - 1 Stromsgodset
Í B-deildinni er Íslendingalið Sogndal búið að missa af umspilssæti eftir tap á heimavelli gegn Start. Valdimar Þór Ingimundarson og Jónatan Ingi Jónsson voru í byrjunarliðinu og fékk Hörður Ingi Gunnarsson að spila síðustu tíu mínúturnar.
Bjarni Mark Antonsson spilaði síðasta hálftímann í liði Start, hann kom inn á völlinn í stöðunni 0-2 og urðu lokatölur 1-2. Start er búið að tryggja sér sæti í umspili um sæti í efstu deild á næsta ári á meðan Sogndal endar um miðja deild.
Arnar Thór Guðjónsson kom þá inn af bekknum í 3-2 tapi Raufoss gegn Ranheim. Raufoss siglir lygnan sjó fyrir lokaumferðina.
Að lokum var Pálmi Rafn Arinbjörnsson ónotaður varamaður er Skeid rúllaði yfir Kongsvinger. Skeid endar í þriðja neðsta sæti og leikur umspilsleik við þriðja efsta sæti C-deildarinnar um sæti í B-deildinni á næstu leiktíð.
Sogndal 1 - 2 Start
Ranheim 3 - 2 Raufoss
Skeid 4 - 0 Kongsvinger
