Noël Le Graët, forseti franska knattspyrnusambandsins, segist vera búinn að senda skilaboð til Claudio Tapia, forseta argentínska knattspyrnusambandsins, vegna hegðunar Argentínumanna eftir sigur í úrslitaleik heimsmeistaramótsins.
Fagnaðarlæti Argentínumanna fóru úr böndunum að mati margra en þeir höfðu einnig hagað sér með ögrandi hætti í sigri gegn Hollandi fyrr í útsláttarkeppninni.
„Ég skrifaði til kollega mins í argentínska knattspyrnusambaninu vegna þess að mér finnast þessar öfgar vera óeðlilegar, sérstaklega í íþróttakeppni," segir Le Graet.
„Ég á erfitt með að skilja hvers vegna þetta þurfi að fara svona langt yfir strikið. Til samanburðar var hegðun Mbappé til fyrirmyndar."
Kylian Mbappe skoraði þrennu í úrslitaleiknum en hún dugði ekki til gegn Lionel Messi og félögum sem unnu eftir vítaspyrnukeppni.
