Enski landsliðsmaðurinn Harry Kane setti nýtt met í þýsku deildinni er hann skoraði þrennu í 3-0 sigri Bayern München á Augsburg gærkvöldi.
Kane hefur raðað inn mörkum síðan hann gekk í raðir Bayern frá Tottenham á síðasta ári.
Hann var markakóngur þýsku deildarinnar á fyrsta tímabili sínu með 36 mörk, en aðeins Gerd Müller og Robert Lewandowski skoruðu fleiri deildarmörk á einu tímabili.
Englendingurinn tók upp þráðinn þar sem frá var horfið og er nú kominn með 14 mörk í deildinni.
Þriðja mark hans gegn Augsburg í gær var 50. deildarmark hans í Þýskalandi og það í aðeins 43 leikjum, en enginn hefur verið fljótari í 50 mörk en Kane.
Erling Braut Haaland skoraði 50 mörk í jafnmörgum leikjum frá 2020 til 2022 og átti metið en það er nú í eigu Kane.
Alls hefur Kane skorað 64 mörk í 62 leikjum í öllum keppnum með Bayern sem er í efsta sæti deildarinnar með átta stiga forystu.
Athugasemdir
