Spænska stórliðið Barcelona glutraði niður tveggja marka forystu í 2-2 jafntefli gegn Celta Vigo í La Liga í kvöld.

Barcelona hefur verið langbesta lið deildarinnar á þessu tímabili og tók það ekki langan tíma fyrir liðið að taka forystuna. Það gerði hinn sjóðheiti Raphinha á 15. mínútu.

Jules Kounde kom löngum bolta aftan fyrir vörn Celta Vigo. Varnarmaður heimamanna rann aðeins til og slapp Raphinha inn í teiginn, sem lék á varnarmann áður en hann skoraði.

Á lokamínútum fyrri hálfleiks vildu heimamenn fá annað gula og rautt á Gerard Martin, leikmann Barcelona, fyrir tæklingu á Iago Aspas.

Dómarinn lét það ekki eftir þeim og hélt leikurinn áfram en Aspas neitaði fyrst um sinn að halda leik áfram í mótmælaskyni. Fékk hann gula spjaldið fyrir þetta uppátæki.

Hansi Flick, þjálfari Börsunga, tók skynsamlega ákvörðun í hálfleik að taka Martin af velli.

Hálftíma fyrir leikslok tvöfaldaði Robert Lewandowski forystu Barcelona eftir að hafa unnið boltann í vítateig Celta Vigo og kláraði hann færið örugglega.

Leikurinn rann úr greipum Barcelona á 82. mínútu. Marc Casado fékk sitt annað gula spjald fyrir að toga andstæðing niður við miðsvæðið og nýtti Celta Vigo liðsmuninn.

Alfon Gonzalez og Hugo Alvarez skoruðu tvö mörk á tveimur mínútum og sáu um að bjarga stigi fyrir Celta.

Lokatölur 2-2. Barcelona er áfram á toppnum með 34 stig, fimm stigum meira en Real Madrid á meðan Celta er í 11. sæti með 18 stig.