Brynjar Björn Gunnarsson, aðstoðarþjálfari Fylkis, var ánægður með hvernig lið hans kláraði mótið, en liðið hafði 3-1 sigur gegn Vestra á Ísafirði í dag.
Lestu um leikinn: Vestri 1 - 3 Fylkir
Fylkir var þegar fallið niður um deild á meðan Vestri var að berjast fyrir lífi sínu.
Árbæingar fóru marki undir inn í hálfleikinn en komu í þann síðari og skoruðu þrjú mörk.
Brynjar var ánægður með frammistöðu liðsins og sagði tilfinninguna góða.
„Góð. Ánægður með að enda mótið á svona jákvæðum nótum og sérstaklega með laskað lið og hóp. Það var smá áskorun í því að koma með liðið hingað, á þessum tímapunkti og ekkert að keppa fyrir. Við spiluðum ágætis leik.“
„Við fórum aðeins yfir það í hálfleik og minntum menn á að það er gott að enda á jákvæðum nótum og taka það með sér inn í haustið,“ sagði Brynjar við Fótbolta.net.
Hann var einnig spurður út í stöðuna á Fylki og líkurnar á að liðið kæmist beint aftur upp.
„Akkúrat núna væru líkurnar góðar en svo veit maður ekki hvað á eftir að gerast í leikmannamálum næstu vikurnar. Einhverjir eru að renna út á samningi og Matthias Præst er að fara og þar fram eftir götunum. Það er erfitt að segja akkúrat núna hvernig hópurinn mun líta út eftir nokkra mánuði.“
Brynjar Björn verður ekki áfram í þjálfarateymi Fylkis. Árni Freyr Guðnason tekur við liðinu í næsta mánuði, en Brynjar mun skoða það betur næstu daga og vikur og sjá hvort það komi upp spennandi tækifæri annars staðar.
„Nei, ég verð ekki áfram hjá Fylki. Það er ljóst og kíkja svo bara á það næstu daga og vikur hvað verður næsta verkefni,“ sagði Brynjar í lokin.
Athugasemdir