Blikar eru í ágætis stöðu í hálfleik
Breiðablik er rúmum 45 mínútum frá því að vinna Bestu deild karla í ár, en liðið er að vinna Víking, 1-0, í úrslitaleik deildarinnar í Víkinni.
Lestu um leikinn: Víkingur R. 0 - 3 Breiðablik
Taugarnar hafa sett sitt mark svolítið á leikinn og liðin fengið fá færi á því að ná góðu spili.
Blikarnir fengu tvö hættuleg færi snemma leiks. Davíð Ingvarsson átti hörkuskot sem Ingvar Jónsson varði út á Höskuld Gunnlaugsson. Hann fann Andra Rafn Yeoman rétt fyrir utan teiginn sem átti ágætis skot en aftur varði Ingvar.
Danijel Dejan Djuric fékk besta færi Víkinga á 26. mínútu er boltinn datt fyrir hann rétt fyrir utan teiginn en skotið vel framhjá markinu.
Vilhjálmur Alvar Þórarinsson, dómari leiksins, var mikið að blása í flautuna, bæði vegna samstuðs og þá var mikið af litlum brotum, en aðeins eitt gult spjald í þessum hálfleik sem Ísak Snær Þorvaldsson fékk á 32. mínútu.
Sex mínútum eftir það kom hann Blikum í forystu. Aron Bjarnason kom með flotta fyrirgjöf inn í teiginn og voru Víkingar í mestu vandræðum með að hreinsa frá. Ísak stal boltanum í teignum og potaði honum undir Ingvar í markinu.
Staðan í hálfleik 1-0 fyrir Blikum sem eru rúmum 45 mínútum frá því að vinna Bestu deildina í ár. Þetta er allt galopið en Víkingum dugir jafntefli til þess að verja titilinn.
Athugasemdir
