„Þetta var helvíti sætt, við ætluðum okkur að sækja þriðja bikarinn á þessu ári og við gerðum það." Sagði Hrannar Björn Steingrímsson eftir að liðið hans vann Fram 4-1 í loka leik tímabilsins í dag.
Lestu um leikinn: Fram 1 - 4 KA
„Ég myndi segja að við höfum verið sterkari aðilinn í kannski 60-70 mínútur. Fyrstu 20 mínúturnar í síðari hálfleik, eiginlega bara fram að því að við skorum þriðja markið, þá vorum við bara undir. Framarar settu góða pressu á okkur og gerðu það bara vel. Á sama tíma fannst mér við vera aðeins of sofandi og að hleypa þeim of auðveldlega inn í leikinn."
KA varð Bikarmeistari fyrr í haust og Hrannar er sammála því að það gerir þetta tímabil að virkilega framgangsríku tímabili.
„Tímabilið í fyrra, það var mikið talað um að það hafi verið vonbrigðartímabil hjá KA. En á sama tíma förum við í bikarúrslit í fyrsta skiptið í 20 ár og förum í 3 umferðir í Evrópu og lendum í 7. sæti. Jú auðvitað viljum við enda ofar í deildinni en heilt yfir á síðasta tímabili, bara mjög gott tímabil. Ég myndi segja að tímabilið í ár sé eiginlega bara ennþá betra þó við endum líka í 7. sæti núna. En við erum með bikartitil í farteskinu og svo auðvitað líka tvo litla bikara fyrst þú nefnir þrennuna. Heilt yfir í sumar, árangurinn, bara ógeðslega ánægður með hann. En að sjálfsögðu horfir maður til baka á byrjun tímabilsins þar sem ef við hefðum bara spilað eðlilega í byrjun þá hefðum við alltaf verið í þessum efri hluta. Við vitum það, og við erum með getuna í það. Þannig að nú þurfum við kannski bara að læra að spila vel í tveimur keppnum á sama tíma. Þetta truflaði kannski aðeins deildina í fyrra að vera í Evrópu og bikarnum á sama tíma. Svo förum við alla leið í bikarnum í ár, ekki að það hafi komið niður á deildinni því við byrjuðum mjög illa í deildinni. Við vissum að við myndum vakna, og við gerðum það en kannski bara aðeins of seint. En við förum bara í efri hlutan á næsta ári."
Hrannar kemur frá Húsavík og ólst upp með sínu heimafélagi Völsungi. Þeir eru komnir í Lengjudeildinni og margir hafa velt fyrir sér hvort Hrannar fari heim.
„Það er bara ekkert undir mig komið. Ég er samningsbundinn, ég á eitt ár eftir af samning. Völsungur þarf þá bara að kaupa mig, þeir mega þá bara henda inn tilboði á KA, síminn hjá Sævari er alltaf opinn. Ég verð eitt tímabil að minnsta kosti í viðbót hjá KA, það er pottþétt."
Viðtalið má sjá í heild sinni í spilaranum hér fyrir ofan.