Jose Mourinho, stjóri Fenerbahce í Tyrklandi, hefur áhuga á því að krækja í framherjann Ansu Fati frá Barcelona.
Fati þótti eitt sinn ein mesta vonarstjarna fótboltans og var talað um hann í sömu setningu og Lionel Messi þegar hann var að koma upp hjá Barcelona.
Það hefur hins vegar heldur betur hægst á ferli hans og hefur hann verið svolítið týndur síðustu ár.
Hann var á láni hjá Brighton á Englandi á síðustu leiktíð en gerði engar rósir þar.
Fati fær núna ekki mikið að spreyta sig með Barcelona en samkvæmt spænskum fjölmiðlum hefur Mourinho áhuga á því að krækja í hann.
Mourinho, sem er einn sigursælasti stjóri í sögu fótboltans, tók við Fenerbahce í sumar en liðið er sem stendur í fjórða sæti tyrknesku úrvalsdeildarinnar.
Athugasemdir