Hægri bakvörðurinn öflugi Reece James er byrjaður að æfa aftur með aðalliði Chelsea eftir að hafa orðið fyrir meiðslum í ágúst.
Hinn 24 ára gamli James hefur misst af gríðarlega miklum spiltíma síðustu tvö ár vegna meiðslavandræða og vonast til að halda sér heilum í þetta skiptið.
James hefur ekki spilað keppnisleik síðan í maí en stóð sig vel í æfingaleikjum á undirbúningstímabilinu í sumar.
Hann hefur aðeins spilað 35 keppnisleiki á síðustu tveimur árum hjá Chelsea vegna meiðsla. James þótti einn af efnilegustu hægri bakvörðum heimsfótboltans fyrir tveimur árum síðan.
James á 16 landsleiki að baki fyrir England þrátt fyrir mikla samkeppni um byrjunarliðssæti og gildir samningur hans við Chelsea næstu fjögur árin.
Athugasemdir