Arnar Gunnlaugsson og Kristall Máni Ingason
Arnar Gunnlaugsson, þjálfari Víkings R, var ánægður með 4-1 sigurinn á Keflavík í Bestu deildinni í kvöld en sagði það sárt að hafa fengið mark á sig undir lokin.
Lestu um leikinn: Víkingur R. 4 - 1 Keflavík
Víkingar náðu að svara ágætlega fyrir 3-0 tapið gegn ÍA í síðustu umferð og skoraði liðið fjögur mörk í fyrri hálfleiknum gegn Keflavík í kvöld.
Hann sá meiri kraft í liðinu og var í heildina afar ánægður með framlagið.
„Ég myndi segja það, já. Hrikalega öflug frammistaða og í fyrri hálfleik settum við tóninn og virkilega kraftmiklir og aggresífir og við hefðum svosem geta skorað fleiri mörk. Keflavík varð fyrir áfalli í upphitun fyrir leikinn og misstu fyrirliðann sinn og svo markmanninn, þeir voru mjög særðir og við gengum á lagið," sagði Arnar.
Adam Árni Róbertsson skoraði mark fyrir Keflavík undir lok leiks en hann var svekktur með að liðið hafi ekki náð að halda hreinu en fagnar samt góðum sigri.
„Já, auðvitað. 4-1 sigur á heimavelli er virkilega sterkt. Maður hefði viljað vera gráðugri og skora fleiri mörk í seinni en frammistaðan í seinni var samt mjög fagmannleg alveg fram í lokin. Það er eðlilegt þegar þú ert 4-0 yfir í hálfleik að þú viljir gera tíu mörk í hverri einustu sókn. Mér fannst við geta haldið boltanum betur og látið þá hlaupa en skil mjög vel að menn vilja láta ljós sitt skína."
„Það er það. Ég er búinn að sjá markið aftur, það var klaufalegt en virkilega vel afgreitt hjá Keflvíkingnum en mjög klaufalegur varnarleikur hjá okkur en fyrir varnarmenn og markmenn er það mjög sárt að halda ekki hreinu en að vinna 4-1 er mjög sterkt."
Víkingar eru hvað sterkastir í því að vinna boltann hátt uppi og keyra á andstæðingana og var Arnar ánægður með hvernig það gekk upp í dag.
„Ég er búinn að bíða lengur eftir svona mörkum í vetur. Við höfum ekki fengið mikið af 'transition' mörkum. Svo kom eitt á móti FH, fyrsta markið og nokkur mörk í dag. Þetta er okkar leikur, vinna boltann hátt uppi og keyra á andstæðingana og mjög ánægður að fá það aftur í okkar leik," sagði hann ennfremur en viðtalið má sjá í heild sinni hér fyrir ofan.
Athugasemdir
