Knockaert er aðeins 32 ára gamall og hóf ferilinn með Guingamp í franska boltanum. Hann vakti athygli með frammistöðu sinni í Ligue 2 og var fenginn yfir til Leicester City.

Eftir dvöl sína hjá Leicester og stutt stopp hjá Standard Liége í Belgíu skipti Knockaert til Brighton, þar sem hann átti magnað tímabil 2016-17. Hann hjálpaði liðinu að komast upp í ensku úrvalsdeildina með 15 mörkum í 45 leikjum í Championship deildinni og er enn í dag í miklu uppáhaldi hjá stuðningsmönnum sem muna eftir mögnuðum töktum hans úti á kantinum.

Knockaert lék einnig fyrir Fulham, Nottingham Forest og Huddersfield Town áður en hann skipti loks yfir til Valenciennes í Frakklandi.

„Það er með blendnum tilfinningum sem ég tilkynni að ég er hættur sem atvinnumaður í fótbolta. Þetta hefur ekki verið auðveld ákvörðun en eftir miklar vangaveltur tel ég þetta vera rétta tímann fyrir mig til að hefja nýjan kafla í lífinu," skrifaði Knockaert á Instagram.