Ákvæðið nemur 50 milljónum evra en þessi öflugi sóknartengiliður mun kosta talsvert hærri upphæð eftir að ákvæðið rennur úr gildi.

Olmo er 26 ára gamall og á þrjú ár eftir af samningi við Leipzig, félag sem hann hefur spilað 148 leiki fyrir á fjóru og hálfu ári.

Olmo er mikilvægur hlekkur í liði RB Leipzig en spilaði aðeins 25 leiki á síðustu leiktíð vegna meiðslavandræða. Hann kom að 13 mörkum með beinum hætti á þeim tíma og hefur svo átt frábært mót með spænska landsliðinu á EM í Þýskalandi sem er í gangi um þessar mundir.

Þar byrjaði Olmo á bekknum í riðlakeppninni en fékk svo byrjunarliðssæti þegar Pedri meiddist og hefur verið í algjöru lykilhlutverki síðan.

Olmo hefur í heildina skorað 11 mörk í 38 landsleikjum með Spáni og er hann kominn með þrjú mörk og tvær stoðsendingar í síðustu fjórum leikjum á EM.

„Ef eitthvað félag vill kaupa mig þá er hægt að nýta ákvæðið til 20. júlí, eftir það verður erfitt að fá mig!" sagði Olmo við El Larguero í gær.

„Ég er samningsbundinn Leipzig og mig langar að vinna titla."