Fótboltafréttamaðurinn Fabrizio Romano greinir frá því að portúgalski bakvörðurinn Nuno Tavares sé búinn að ná samkomulagi við Lazio um kaup og kjör eftir að Arsenal samþykkti kauptilboð í leikmanninn.
Tavares er búinn að samþykkja fimm ára samning hjá Lazio og borgar ítalska félagið 9 milljónir evra fyrir. Bakvörðurinn verður lánaður til Lazio með kaupskyldu og heldur Arsenal 20% hagnaði af næstu sölu leikmannsins.
Tavares er 24 ára gamall og hefur verið samningsbundinn Arsenal í þrjú ár án þess að takast að ryðja sér leið inn í byrjunarliðið.
Á tíma sínum hjá Arsenal var Tavares lánaður til Marseille í Frakklandi, þar sem hann átti mjög gott tímabil, og svo til Nottingham Forest þar sem tækifærin voru af skornum skammti.
Tavares spilaði í heildina 28 leiki í Arsenal treyju en það er ljóst að hann er ennþá afar efnilegur leikmaður og gæti skinið skært á næstu árum.
Athugasemdir
