Logi Tómasson, vinstri bakvörður Strömsgodset, er afar eftirsóttur um þessar mundir enda búinn að vera að gera flotta hluti á sínu fyrsta tímabili í efstu deild norska boltans.
Logi hefur verið að spila sem vængbakvörður í 3-5-2 leikkerfi Strömsgodset, sem er komið með 19 stig eftir 13 umferðir af deildartímabilinu.
Logi hefur komið að 7 mörkum í 18 leikjum í öllum keppnum og eru félög í Hollandi og Belgíu áhugasöm.
Eins og hefur verið greint frá vill Freyr Alexandersson fá Loga til sín í Kortrijk í Belgíu, en samkvæmt heimildum Fótbolta.net hafa Íslendingaliðin FC Groningen og Twente, sem leika í hollenska boltanum, einnig áhuga.
Brynjólfur Andersen Willumsson er á mála hjá FC Groningen á meðan Alfons Sampsted er hjá Twente.
Logi, sem er uppalinn hjá Víkingi R. og HK, er 23 ára gamall og á þrjá A-landsleiki að baki fyrir Ísland.
Athugasemdir
